Қайғылы статистиканы арттырады

Ақмола ЖТ бөлімшесінің теміржолшылары қайғылы жағдайлардың алдын алу бойынша вокзалда, перронда және Көкшетау станциясының вокзал алды алаңында профилактикалық шара өткізді. Акция теміржол көлігі нысандарындағы, әсіресе кәмелет жасқа толмағандармен байланысты қайғылы жағдайлардың алдын алуға бағытталған.

Олар теміржол аумағын аралап жүріп, ақмолалықтар мен қала қонақтарына пойызды станцияның белгіленген орындарында, вокзалда күтіп, перронға кіріпшығу, пойыз жақындап қалғанда платформа шетінен санағанда 3 метрден кем емес қашықтықта тұру керектігін, жолаушыларды отырғызу немесе түсіру пойыз толық тоқтаған соң ғана жүргізілетінін тәптіштей түсіндіріп, арнайы ескерту парақшаларын таратты.

Бүгінгі таңдағы жағдайға байланысты коронавирус індетінің таралмауы үшін адамдар арасындағы қашықтықты сақтап, маска мен қолғап кию аса маңызды екенін ескертті.

– Теміржолдағы қайғылы оқиғалар статистикасынан кейін осындай акциялар өткізіп, қарапайым нәрселерді еске салып отыруға мәжбүрміз. Азаматтардың абайсыздығы – осы қайғылы статистиканы арттырып отыр. Балалар үлкендердің қадағалауында болуы тиіс. Вокзал мен перрондарда ғана емес, сонымен қатар теміржолға жақын кез келген жерде ойнауға ғана емес, жүруге тыйым салынады. Біз жолаушыларға осыны жеткізуге тырысамыз, соны естеріне сақтауы үшін жадынамалар таратамыз, үш адамның бірі содан қорытынды шығарса, біздің еңбегіміздің ақталғаны, – дейді Ақмола ЖТ бөлімшесінің техникалық бөлімінің бастығы Гүлнар Шинкович.

Акция барысында теміржолшылар халыққа жолды тек арнайы белгіленген жерлерден: жаяу жүргіншілер көпірлері мен тоннелдер арқылы кесіп өтуі керектігін, жастарға құлаққаппен музыка тыңдамау керектігін ескертті. Себебі бұлардың бәрі айналаңды дұрыс көріп, артық дыбыстарды естуге кедергі келтіреді.

Пойыз машинисі берген дыбыстық белгілерге дұрыс мән беріп, вокзал дикторының дауыс зорайтқышпен айтқан хабарламасын мұқият тыңдау да маңызды. Бойында кернеуі бар нысандарға жақын баруға болмайды. Түйіспелі электр желісінен тоққа түскен жағдайда адам сол мезет тіл тартпай кететіні жайлы қайғылы статистикадан мысал да келтірілді.

Вагондардың төбесіне, басқыштарына, өту алаңдарына, автотіркегіштеріне мінуге тыйым салынатыны, сондай-ақ, пойыз жүріп бара жатқанда пойызға мінуге және түсуге, вагон ішінде терезеден және тамбур есігінен бас шығарып қарауға болмайтыны қайталап айтылды.