Арыста 8 айында мал басу оқиғасы 8 рет орын алды
Шымкент қаласы бойынша меншікті тілшісі
Темір жол аса қауіпті аймақ екені бәрімізге белгілі. Дегенмен оның зардаптары мен шығындарының қаншалықты зор екеніне мән бере бермейтіндер бар. Соның салдарынан адамдар орны толмас қайғы мен өзекті өртеген өкінішке тап болып жатады.
Арыс жол дистанциясы Түркістан облысының бес ауданы арқылы өтетін темір жол торабына жауапты. Еліміздің оңтүстігі халықтың тығыз орналасқан және жеке малды көп ұстайтын аймағы болғандықтан, жол бойына жағалай орналасқан ел де көп, мал да көп. Темір жолға жақын орналасқан сол ауыл халқының негізгі күнкөрісі – осы темір жол мен қорадағы ірілі-ұсақты малы. Малды қысы-жазы қолда ұстау тиімсіз болғандықтан, малдың аузы көкке іліне сала өріске жаяды. Оңтүстіктің ауа райы жаз кезінде өте ыстық болғандықтан, шөптер тез қурап сарғаяды. Сол кезде қараусыз жайылып жүрген мал темір жол маңына қарай ойыса бастайды. Темір жол қоршауының ішіндегі «мұрты бұзылмай» тұрған шөп малды «менмұндалап» шақырып тұрады. Шағын станциялардағы тұрғындардың және теміржолшылардың ары-бері өтуіне арналған өткелдер адамдардың салғырттығынан көбіне ашық қалады. Сол тұстан қараусыз мал теміржол қоршауының ішіне еніп кетеді. Сегіз сағаттық жұмыс кестесімен еңбек ететін теміржолшылар кешкі немесе түнгі уақытта қоршау ішіне кіріп кеткен мал туралы пойыз машинистері мен станция кезекшілерінен немесе жол диспетчерінен естіп, тәуліктің кез келген уақытында сол жерге жетіп, қауіпсіздікке қатер төндірген малды жолдан қууға мәжбүр.
«Біз өз тарапымыздан тұрғындарға ескертудей-ақ ескертумен келеміз. «Сақтансаң сақтайды» демекші, сол малды бағып, төлін, сүтін, етін сатып күнкөріс жасап жүрген тұрғындарға малдан айырылып қалудың және пойызды тоқтатқаны немесе локомотивті зақымдағаны үшін төленетін айыппұлдың да өз қалталарына ауыр тиетінін біз де түсінеміз, түсіндіріп айтамыз. Ірі қара малдан бір айырылып, одан қала берсе теміржолға келген шығынды өтеп жатса, ол мал иесіне де оңай болмайды. Бірақ соны біле тұра, ірі қара малды қараусыз қалдырып, өтпені ашық қалдырып кететіндерін біз түсіне алар емеспіз. 2020 жылдың 8 айында мал басу оқиғасы 8 рет орын алды, бұл өткен жылмен салыстырғанда әлденеше есе артық», – деді Арыс жол дистанциясы бастығының орынбасары Жандос Қошбағаров.
Ал қала маңына жақын аймақтарда адамдардың пойыз астына түсіп қалу оқиғалары орын алып жатады. Теміржолдан ары-бері өтуге тек белгіленген жерлерде ғана рұқсат берілген. Теміржол бойында бөгде адамдардың жүруіне мүлде тыйым салынғандығы туралы да түсіндірме жұмыстары тұрақты жүргізіліп тұрғанына қарамастан адамдар пендешілікпен асығып өз өмірлерін қатерге тігеді. Сол кездейсоқ жандардың кесірінен биыл Арыс жол дистанциясында 5 рет шұғыл тежеу орын алып, бір адам өлімі тіркелген. Жалпы 2017 жылдан бері адам басу оқиғасы осымен алтыншы рет тіркеліп отыр екен.