Еңбек демалысына шыққан теміржолшыға құрмет көрсетті
Ақтөбе облысы бойынша меншікті тілші
Қарттар күні қарсаңында Қандыағаш станциясының ұжымы осы станцияны 19 жыл басқарып, құрметті еңбек демалысына шыққан Нұрибай Сәрсеновке құрмет көрсетті.
«Нұрибай Аманғалиұлы, Қандыағаш тораптық станциясының ұзақ жыл тек алдыңғы шептен табылуы – сіз секілді шебер ұйымдастырушы басшының еңбегі. Жылдар бойы өндірістік-қаржылық көрсеткішті өрге сүйреу үшін аянбай жасаған еңбегіңіздің куәсі болдық. Бүгін ортамызға шақырып, ұжым алдында сізге тағы да алғыс айтуды жөн санадық», – деді Қандыағаш станциясының басшысы Медет Аяғанов.
Қазақстан темір жолы тарихына аты алтын әріппен жазылған тарлан теміржолшыны әріптестері қос мерекемен құттықтап, естелік сыйлықтар тарту етті.
Теміржолшының туған күні қарттар мерекесімен тұспа-тұс келген.
Нұрибай Аманғалиұлы – салада 44 жылға жуық еңбек еткен тәжірибелі теміржолшы. 1976 жылдан еңбекке араласып, 2002-2019 жылдар аралығында станцияны басқарып, бірнеше мәрте «Үздік басшы» атағын иеленген өз ісіне берілген талапшыл басшы бола білді. Өз ұжымын өрге сүйреп, темір жол саласының дамуына өлшеусіз үлес қосқан ардагер теміржолшы кездесуде жас әріптестеріне ризашылығын білдірді.
«Қазақстан теміржолының жүк тасымалы, жолаушылар тасымалында біздің станцияның орны ерекше.
Сондықтан станцияны үздіктер қатарынан түсірмеуге аянбай еңбек ете беріңіздер. Бәріңе де алғысым шексіз, еңбектеріңнің жемісін көріңдер», – деді ардагер теміржолшы Нұрибай Сәрсенов.