Шымкентте 13 вагон рельстен шығып кетті

Шымкент қаласының темір жол станциясында 13 вагон рельстен шығып кетіп, апатты жағдай орын алды. Оқиға 24 қазанға қараған түні сағат 2.31-де болған. Төтенше жағдай Шымкент станциясының №117 бағытында болды. 

Абырой болғанда қайтыс болғандар мен зардап шеккендер жоқ. Орын алған апат салдары пойыздар қозғалысына да әсер еткен. 5 жолаушы және 10 жүк пойызы кідірген. Оқиғаның себептері мен шығынын Төтенше жағдай министрлігінің мамандары мен теміржолшылар анықтауға кірісті.

Аударылып, шашылып қалған вагондарды жинап, апатты жойып, жолды қалпына келтіруге Шымкент, Арыс және Тараздан үш бірдей қалпына келтіру пойыздары келіп жетіп, тағы да 200 теміржолшы жұмылдырылды. Бұдан бөлек, оқиға орнында Шымкент қаласының Төтенше жағдайлар департаментінің 6 қызметкері және 3 бірлік техника, Шымкент станциясы Ішкі істер желілік полиция бөлімінің 10 қызметкері және 1 техникасы жұмыс істеді. Олар ең бірінші кезекте жолды босатып, тоқтап қалған пойыздардың қозғалысын қалпына келтіруге күш салды. Жұмыс бір минут та тоқтаусыз жүрді. Нәтижесінде 24 қазан сағат 13.00-ге 1 жолды ашып, пойыздарды өткізе бастады.

Оқиғаға байланысты түсініктеме берген «ҚТЖ» ҰК» АҚ баспасөз қызметінің хабарлауынша, вагондардың жолдан шығуы себептері мен жағдайлары анықталып жатыр. Ресми мәлімдемеде «2020 жылдың 24 қазанында 1 сағат 35 минутта Шымкент қаласында «Кедентранссервис» АҚ кірме жолымен шығып бара жатқан бос контейнерлер тиелген 21 вагонның 13-і жолдан шығып кетті.

Тараз станциясы бағыты бойынша пойыздарды өткізу ауқымы жоқ. Қалпына келтіру жұмыстары жүргізілуде»

делінген.

Оқиғаның салдарынан жүк пойыздары мен жолаушылар пойыздары уақытша тоқтатылды. Қозғалысы 1 сағат пен 9 сағат аралығында кешіктірілген жеті жолаушы пойызында 1393 жолаушы болған. Шымкент қаласына жолаушыларды тасымалдау үшін жергілікті атқарушы органдар 5 шағын автобус пен 2 автобус ұйымдастырды.

«Шымкент, Арыс және Тараз станцияларынан қалпына келтіру пойыздары дер кезінде көмекке келді. Бөлімшеге қарасты ПЧ, ЭЧ, ШЧ мекемелерімен қоса Қорғасын, Қазығұрт, Қызылсай станциясында еңбек ететін 200-дей теміржолшы қалпына келтіру жұмыстарына атсалысты.

Теміржолшылардың жұдырықтай жұмылған еңбегінің арқасында тоғыз-он сағатта қозғалыс қалпына келтірілді», – деп түсініктеме берді Шымкент жүк тасымалы бөлімшесінің бас инженері Ильяс Нұржанов.