Маңғыстаудың вокзалдарында мүмкіндігі шектеулі жолаушыларға мүмкіндіктер молаюда

Маңғыстаудың теміржол вокзалдарында мүмкіндігі шектеулі жолаушыларға мүмкіндіктер молаюда. Енді зағип жандар вокзалдағы қажетті қызметтерге біреудің көмегінсіз-ақ қол жеткізе алады.

Олар вокзал ғимаратының ішінде еш қиындықсыз жүріп тұрып, ненің қайда орналасқанын өзгеден сұрамай-ақ өздері оқып алуына болады. Вокзал ғимаратының кіреберісіне арнайы мнемосхема құрылғысы қойылды. Әзірге мұндай жаңа дүние жолаушылары көп Маңғыстау және Бейнеу вокзалдарына орнатылды. Аталған ақпараттар тақтасы адам ұстап, еркін оқуына болатындай қолжетімді биіктікте тұр. Онда көз жанарынан айрылған азаматтар оқуға болатын таңбалы жазумен жазылған барлық қажетті мағлұмат бар. Ақпараттар қазақ және орыс тілінде кәдімгі және зағиптарға арналған жазумен көрсетілген.

Ішінде ғимараттың толық схемасы мен ондағы жүріп тұратын әрбір бұрыш, қызмет алуға болатын әр нүктенің орналасқан орны бейнеленген. Бір сөзбен айтқанда, вокзалдың картасы сол тақтайшада.

 − Әлемдік стандартқа сай мнемосхеманы жақында ғана іске қостық. Сонымен қатар бұрыннан бері вокзалға кіреберісте оң жағында қызметкерлерді шақыру батырмасы жұмыс істейтін. Ол батырманың да жазуы зағиптарға қолжетімді болды. Одан бөлек біраз уақыт бұрын кемтар кісілерге арналған касса жұмыс бастаған еді. Яғни, арбамен жүретіндердің қолы жетуі үшін әдеттегі кассаның төменгі жағынан тағы бір терезе ашылды. Ондай азаматтар сол жерден қызмет ала алады, – дейді Маңғыстау теміржол вокзалының бастығы Айгүл Әмірова.

 Маңғыстау вокзалында мүмкіндігі шектеулі жандарға қоларбамен қызмет көрсету жолға қойылған. Аталған санаттағы көмекті керек етушілерге арналған төрт қоларба бар. Дегенмен, оны айына небәрі екі-үш адам пайдаланбаса, көп сұраныс бола бермейтін көрінеді.