Ақтөбеде 2500 теміржолшы вакцина алды
Ақтөбе облысы бойынша меншікті тілші
Ақтөбе жүк тасымалы және магистральдық желі бөлімшелерінде бүгінгі күні барлығы 2500 теміржолшы вакцина алды. Бөлімшеде коронавирус пандемиясы уақытында вакцинацияланудың маңызды екені туралы жиі айтылып, түсіндіру жұмыстары тұрақты өтіп тұрады. Мемлекет басшысы ХХІ ғасырдың қатерлі індетіне айналған коронавирус инфекциясымен күрестің жалғыз жолы – вакцина алу екенін түсіндірді және қоғамдық иммунитетті қалыптастыру үшін халықты вакцинамен қамтамасыз етудің маңыздылығын айтты. Санитарлық-эпидемиологиялық нормаларды сақтау және коронавирус инфекциясына қарсы вакцинациялау бойынша кең ақпараттық түсіндіру жұмыстарын жүргізуді тапсырды. Індеттің алдын алу, вакцинаның тиімділігіне қатысты жұмыстар теміржолшылар арасында да қарқынды өтуде. Соның ішінде Ақтөбе бөлімшесінде де вакцинациялаудың тиімділігін жеткізетін түсіндіру шаралары тұрақты өтеді. Бөлімше осы бағыттағы бірлескен жұмыстарды жандандыру үшін «Mediker» медициналық орталығымен келісімге де отырды. Қазір теміржолшылар бөлімшеден шықпай вакцина салдыра алады. Бүгінде Ақтөбе жүк тасымалы және магистральдық желілік бөлімшелерінде 2500 теміржолшы коронавирус инфекциясына қарсы екпе салдырды. «Елімізде 1 ақпаннан бастап жаппай вакцинациялау басталады. Вакцинация инфекциялық жұқпалы аурулардан, соның ішінде COVID-тен қорғанудың ең қауіпсіз әрі тиімді жолы. Жаппай вакциналау өте маңызды. Сондықтан теміржолшылар бұл аумақтық процестен тыс қалған жоқ. Бөлімшеде вакцина салдыруға 30-ға жуық қызметкер ниет білдірсе, дәрігерлер жұмыс орнымызға келіп екпе жасайды. Қалған кезде әр теміржолшы өз учаскесінде екпе салдырып жүр», – дейді Ақтөбе ЖТ қызметкерлермен жұмыс істеу бөлімінің бастығы Абзал Ғаббасов. Ал Ақтөбе магистральдық желі бөлімшесіндегі теміржолшылардың 28 пайызы вакцина алды. Соның ішінде халық көп жиналатын вокзал қызметкерлерінің вакцинацияланудағы жауапкершілігі түсіндірілуде. Сары аймақтағы Ақтөбе өңірінде эпидемиологиялық жағдай тұрақты. Десек те, тәулігіне жиырмадан аса адамнан ПТР тест қорытындысы бойынша ауру белгілері расталады. Сондықтан вакцина алудың маңыздылығы туралы түсіндіру жұмыстары тоқтаған жоқ.