Көктемгі тексеру кезінде техникалық қауіпсіздікті сақтау бойынша 119 кемшілік анықталды

Теміржол шаруашылығында жолдың сапалы болуы басты орында тұрады. Себебі, қауіпсіздікке бірден бір кепіл – ол сапалы көрсеткіштер. Ал жолды күтіп-баптап ұстауды, адами еңбек күші мен техникалық ресурстарды қамтиды. Бүгінде Шымкент жол дистанциясында 15 ақаутапқыш арбаның 12-сі жұмыс істеп тұр. «Биыл көктемгі тексеру кезінде еңбекті қорғау және техникалық қауіпсіздікті сақтау бойынша 119 кемшілік анықталды. Негізгі кемшіліктер күнделікті қолданатын құрал-саймандарды жөндеу, балға, күрек саптарын ауыстыру, т.т. ұсақ-түйек болғанмен, дистанция басшылығы оларды жоюды бірден қолға алды. Бүгінде 119 кемшіліктің 85% жойылды. Ал ақаутапқыш техникаларды жөндеп, толықтыруға РДМ-22 түрлендіргіш блогынан 5 дана, акуммулятор 20 амп – 5 дана, РДМ-22 орталықтан- дыру жүйесінен 3 дана қажеттігін анықтадық. Бұл техникалар толық болған жағдайда жолшылардың жұмысы жеңілдеп, жақсара түсері сөзсіз», – деді дистанцияның жетекші инженері Дана Өмірбаева. Айта кетейік, Шымкент жол дистанциясында жасанды құрылыстар мен жер төсемдері де жоспарға сай үнемі тексеруден өтіп тұрады. Жолшылар қазірге дейін 3 темір көпірді, 97 темірбетон көпірді, 214 темірбетон құбырын, 40 дана бетон құбырын, 4 жаяу жүргіншілер көпірін тексеруден өткізді. Ал көктемгі тексеру кезінде 77 кемшілік табылған болатын, 20 көпірде шпал астындағы шағылтастар нормадан артық болып шыққан. Жолшылар 18 құбырдың жан-жағын шөптен тазартты, 12 құбырдың аузын тастан аршып тазартты. Бұдан басқа, 166 көпірдің ағаш білеулерінің ақауын белгілеп, 11 құбырдың қабырғасын тот басып кеткенін, 4 көпірдің кері қабырғасын ұзарту керектігін, 12 көпір мен құбыр бастарын биіктету қажет болғанын анықтады. Бүгінгі таңда аталған кемшіліктердің 53% жойылыпты.