Шымкентте қараусыз малдан қайыр болмай тұр

Жыл басынан бері Шымкент магистральдық желі бөлімшесі бойынша пойыздар қозғалысы қауіпсіздігі толық сақталып отыр, ешқандай қауіпті бұзушылықтарға жол берілмеді. Дегенмен, басты қауіп қараусыз жайылған төрт түліктен төніп отыр. Теміржолшылардың бас ауруына айналған мал басу оқиғасы биыл да азайған жоқ. Машинистер тарапынан 12 шұғыл тежеу оқиғасы орын алды. ПЧ-53 бойынша 8 жағдай, ПЧ-54 бойынша 4 жағдай тіркелді. Бұл былтырға қарағанда азайған көрінеді, өткен жылы бұл уақытта 49 жағдай тіркелген болатын. Екі жол дистанциясы бойынша төрт мал басу оқиғасы орын алды. Көктерек-Түлкібас өткеліндегі 3374 шақырымдағы төртінші пикетте жылқыны қағып кеткен. Дегенмен локомотивке ешқандай зиян келмеген, теміржолдың бойында қоршау болмаған. Түркістан-Арыс учаскесіндегі РЗД-37 – Қарақоңыр өткелінде 3181 шақырымдағы 8 пикетте №2624 пойыздың машинисі Расулов шұғыл тоқтауға мәжбүр болды. Себебі жолдың бойында түйе жайылып жүргендіктен дер кезінде тоқтатып үлгерді. Мұнда да жолдар қоршаусыз болған. Түлкібас-Арыс теліміндегі Қорғасын-Игілік өткелі 3275 шақырымдағы бесінші пикетте №2493 электровоз 62 км/сағат жылдамдықпен келе жатып, шұғыл тоқтауды іске қосты. Себебі машинист Нұрбеков жолда жайылып жүрген сиырды көріп қалады. Малдың иесі табылып, оған Шымкент ЖПБ капитаны хаттама толтырды. Тағы бір мал қағу дерегі Қалаш-Бадам өткелінде орын алды. Мұнда да машинист жолда жайылып жүрген сиырды көріп, шұғыл тоқтады. Жол екі жақта да қоршаулы болған, локомотивке зиян келмеген. Арыс-Сарыағаш учаскесі Жылға-Дарбаза өткелі 3312 шақырымдағы төртінші пикетте 2329 электровоздың машинисі Иманбеков 45-50 км/сағ жылдамдықпен шұғыл тежеу қолданды. Себебі жолда сиыр жайылып жүрген. Локомотивке зақым келмеген. Сонымен қатар, Сарыағаш-Дарбаза мен Ынтымақ-Манкент өткелі аралығында да сиыр және жылқы малын қағып кете жаздаған дерек тіркелді. Аталған мәселені жанайқай қылып жыл сайын көтерсе де теміржолға жақын тұратын тұрғындардың қаперіне кіріп-шықпайтыны қынжылтып тұр дейді сала мамандары.