Ақтөбе станциясы аумағында үш күнде 34 әкімшілік құқық бұзушылық анықталды

Өткен аптаның соңғы үш күнінде Ақтөбе станциясының қызметкерлері желілік полиция бөлімімен бірлесе теміржол аймағында тәртіпсіздікке және құқық бұзушылыққа «мүлдем төзбеушілік» атты кең көлемді акциясын өткізді. Теміржолшылар тұрғындардың бейқамдығы мен өміріне жауапкершілік танытпайтындығына алаңдайды. Ақтөбе станциясы аумағында үш күнде 34 әкімшілік құқық бұзушылық анықталды. Сондықтан, акция барысында сақтық шараларына шақырған парақшалар таратып, тұрғындарды қауіпсіздік ережелерін ескеруге шақырды. «Арнайы белгіленген жерден өту, жол бойында құлаққап тақпау, станция аумағын, теміржол бойын таза ұстау туралы жұмыстар апта сайын өтеді», – деген Ақтөбе станциясының басшысы Нұрлан Ермағамбетов әр аптаның 7 күнінде 24 сағат бойы қауіпсіздік басты назарда екенін жеткізді. «Акцияның негізгі мақсаты – азаматтардың құқықтық санасы мен мәдениетін арттыру, халықтың арасында тәртіпсіздікке және ұсақ құқық бұзушылыққа «мүлдем төзбеушілік» қағидатын қалыптастыру, сондай-ақ қоғамдық тәртіп пен азаматтардың тыныштығына әсер ететін ұсақ құқық бұзушылықтарды ескерту және анықтау болып табылады», – дейді Көліктегі ПД Ақтөбе станциясындағы желілік полиция бөлімінің қызметкері Роза Төлегенқызы. «Мүлдем төзбеушілік» акциясы аясында үш күнде 34 әкімшілік құқық бұзушылық анықталды. Тәртіп сақшыларымен әкімшілік хаттама толтырылып, түсіндірме жұмыстары жүргізілді. «Егер әр азамат өз-өзіне бекем болып, сақтық шараларын сақтап жүрсе, соның өзі қауіпсіздіктің сақталуына үлкен үлес» дейді акцияны ұйымдастырушылар.