Ақпараттық насихаттың арқасында Ақтобеде індетке шалдығатындар саны күрт азайды

Ақтөбе ЖТ бөлімшесі бойынша коронавирус инфекциясына қарсы екпе салдырғандар саны артты. Соңғы кезде теміржолшылар арасында қауіпті індетті жұқтырғандар да күрт азайған. Басшылық оның бір ұшы халыққа індеттің қаупі және вакцинаның маңызы жайлы шынайы ақпарат беруде жатыр деп санайды. Өткен аптада Ақтөбе локомотив пайдалану депосында «Өзіңді және жақындарыңды қорға» деген тақырыпта COVID-19-ға қарсы ұжымдық вакцинацияның маңыздылығын түсіндірген шара өтті. Ақпараттық түсіндіру кезінде пандемияға қарсы күресте жалғыз жол ретінде таңдалған вакцина алу науқаны теміржолшылар арасында белсенді өтіп жатқаны айтылды. Оған дәрігерлердің арнайы жүргізген түсіндіру жұмыстары да оң әсер еткен.

«Сондықтан жалпы қоғамдық иммунитет қалыптасқанша түсінік жұмыстары жалғаса бермек, ақпарат артық болмайды»,– дейді дәрігерлер.

Теміржол мекемелері «Медикер» ЖШС-мен келісімге келген. Медициналық орталық дәрігерлері теміржолшыларға екпе алудың маңызы мен екпе алғаннан кейінгі сақтық шараларын ескертсе, N3 қалалық емхананың жылжымалы вакцинация тобы мекемелерді аралап жүр. Ақтөбе локомотив пайдалану депосының басшысы Нұрлан Көшербаев еңбек ұжымымен бірге болып, иммундаудың маңыздылығына тоқталды.

«Вирус өте қауіпті әрі ол тез жойылмайды, сондықтан біз оған қарсы күш біріктіруіміз керек. Ел президенті халықтың денсаулығына төнген қауіппен күресудің жолы – вакцина алу екенін айтты. Ең бастысы – ұжымдық иммунитетті қалыптастыру. Халықтың 60-70 пайызы екпе алса, індетті жеңуге болады. Еліміздегі жолаушы және жүк тасымалын ұйымдастырып отырған теміржолшылардың қоғамдық жауапкершілігі жоғары. Дәрігерлер екпені мекемеге келіп те салып жатыр. Барлық жағдай жасалған», – деді депо басшысы Нұрлан Көшербаев.

Бүгінде деподағы 697 жұмысшының 385-і вакцинацияланды. Мекемеде қазір вакцина алғандар саны 55 пайыздан асып отыр. Дәрігерлер де өңірде вакцина салдырып жатқандар қатары артқанын хабарлады. Қазіргі кезде күніне 2 500- 3 000 адам екпе алып жатыр екен. Айта кетейік, елімізде коронавирус инфекциясын жұқтырғандар саны қайта өсті. Сегіз бірдей облыс «қызыл» аймақта қалды. Бұны дәрігерлер «дельта» жаңа штамының таралуымен байланыстырады.