Ақтөбе-Товарная станциясында ағаш шпалдар темір-бетон шпалдарға ауыстырылды

Ақтөбе-Товарная станциясы аумағына ағымдағы жөндеу жұмыстары жүргізілді. Вагондарды сұрыптау, сақтау, жүктерді жөнелту жұмыстары атқарылатын таулы аймақтағы станцияда үш мың ағаш шпалдар отандық темір-бетон шпалдарға ауыстырылды. Биыл станциядағы 800 метр болатын төрт сұрыптау жолы жаңарды. Жол табанын сауықтыру жұмыстары екі айға созылған. Аталған жұмыстар учаскедегі жол сапасын жақсартып, қауіпсіздігін күшейтетіні сөзсіз. Себебі бетон шпалдардың тез шіритін ағаш шпалға қарағанда қызмет көрсету мерзімі ұзақ әрі берік. Осыған дейін 2006 және 2015 жылдары станция аумағындағы сұрыптау жолдарына орташа жөндеу жұмыстары жүргізіліп, ағаш шпалдардың беріктігі арттырылған. Маневрлік жұмыстар көп болатын станцияда ағаш шпалдар қауіпсіз емес. Сондықтан оларды темір-бетонға ауыстыру жылдық жоспарда қарастырылған.

– Жөндеу жұмыстары негізінен кешенді көлік көмегімен жасалынды. Мұнда адам күші аз қажет етіледі. Жөндеу жұмыстары кезінде 20 жол монтері тартылды. Жұмысшылар арнайы киімдермен толық қамтамасыз етілген. Қауіпсіздік және еңбекті қорғау шаралары алынған. Станция аумағындағы ағаш шпалдарды темір-бетон шпалдарға ауыстыру, бағыттамалық бұрмаларды алмастыру, қайта тігу, түзету бойынша ағымдағы жөндеу жұмыстары жүргізілді. Жөндеу жұмыстары кезінде қозғалыс тоқтаған жоқ, – дейді Ақтөбе жол дистанциясы басшысының орынбасары Дархан Орынбаев.

Жол дистанциясы келесі ағымдағы жөндеу жұмыстарын Қаратоғай станциясында жалғастырып жатыр.