Еңбегі еленген ақтөбелік теміржолшылар марапатталды
Ақтөбе облысы бойынша меншікті тілші
Ақтөбеде кәсіби мерекеге орай ұйымдастырылған салтанатты шараға пандемияға байланысты биылғы жылы марапат алған теміржолшылар ғана шақырылды, деп хабарлайды Rail-news.kz. Сала қызметкерлерін төл мерекемен құттықтаған Ақтөбе магистральдық желі бөлімшесінің басшысы Серғали Жайлаубай қос бірдей теміржолшының омырауына «Құрметті теміржолшы» төсбелгісін тақты. Теміржол саласында ұзақ жыл еңбек еткен Ақтөбе магистральдық желі бөлімшесінің бас инженері Сәндібек Аманбаев пен Қандыағаш белгі беру және байланыс дистанциясының бастығы Мақсұт Мұрсал Қазақстан Республикасының Инвестициялар және даму министрінің бұйрығымен «Құрметті теміржолшы» атанды. Сонымен қатар, салтанатты шарада «ҚТЖ» ҰК» АҚ басқарма басшысының бұйрығымен Ақтөбе магистральдық желі бөлімшесі техникалық бөлімнің бас инженері Роза Айбасова, Ақтөбе локомотив пайдалану депосының тепловоз машинисі Серікқали Үмбетов, Ақтөбе магистральдық желі бөлімшесі тасымалдауды ұйымдастыру орталығының пойыз диспетчері Дәрібай Бижанов, Ақтөбе ЖТ бөлімшесі қозғалыс қауіпсіздігі нормативті-техникалық құжаттарын өңдеу бөлімінің жетекші инженері Түгелдес Борамбаев, Ақтөбе жол дистанциясының жол монтері Айбек Құлшымбаев «Адал еңбегі үшін» белгісімен марапатталды. Салтанатты шара теміржол көлігі кешенінде ұзақ жыл еңбек еткен теміржолшыларға «Үздік маман», Құрмет грамотасы, Алғыс хаттарды табыстаумен жалғасты.