Жұттан темір жол жағалаған малды пойыз қақпауы үшін 10 шақырымдық қоршау салынды

Маңғыстаудың малдарына биыл нағыз жұт келгендей. Қуаңшылық кесірінен жем іздеген аш-арық мал теміржолды жағалап жүр. Биылғы жылдың бес айында 62 мал пойызға басылған. Адал малдың бұлай арам қатып жатқанына жүрек сыздап, жаның ашиды... Қозғалыс қауіпсіздігі департаментінің Маңғыстау теміржолы бойынша бас ревизоры өткен бес айда маңғыстаулық машинистер жолға шыққан малды баспас үшін жүзге жуық шұғыл тежеу беріпті. Бұл жалпы түбек теміржолы бойынша. Ал бір ғана Маңғыстау жол дистанциясының аумағында шұғыл тежеулер саны жүзден де асып кеткен.

– Жыл басынан тамыз айына дейін жолға шыққан мал үшін ТЧЭ-6 машинистері тарапынан 137 оқыс тежеу тіркелді. Соның 28-і мал басылумен аяқталды. Биылғы құрғақшылықтың да салдары болар, төрт түлік теміржол жағалауға үйір. Жол жиегіне шыққан азын-аулақ шөпті талғажау етемін деп пойыздың астына түседі. Малдың жолға көп шығатын бекеттерді аралап, жергілікті тұрғындармен кездесулер ұйымдастырып, жеті айда жалпы саны 824 адамға түсінік жүргіздік, одан пайда жоқ, ашынған халық өзімізге дүрсе қоя береді, – деген Маңғыстау жол дистанциясының жетекші жол инженері Ержан Артықбаев теміржолдағы малмен байланысты жағдайдың алдын алу үшін бұдан бөлек қоршауларды жөндеу, жаңадан салу жұмыстары өз ретімен жалғасып жатқанын айтады.

Мекеме биыл жоспар бойынша 25 шақырым малдан қоршау салуды жоспарлаған. Тамыз айына дейін соның 10 шақырымы біткен. Дистанция мамандары әкімдік, желілік полиция бөлімшесінің инспекторлары, магистральдық желі бөлімшесінің қызметкерлерімен бірлесе мал иелерімен профилактикалық жұмыстарды жүргізіп-ақ жатыр, теміржол маңына мал баққан азаматтарға 5 АЕК мөлшерде айыппұл салынатынын да ескертеді. Әрине, айыппұл өз алдына. Одан бұрын теміржол қауіпсіздігі, малынан айырылған отбасының бюджетіне түсетін салмақ бар. Сыртқа айдалған малдың қуаңшылықтан күйіп кеткен далада шөп таппай сенделіп құламасына не пойыз астына түсіп арам қатпасына кім кепіл? Бір шара қабылдау керек-ақ...