Жіңішке станциясы ТМД-дан бөлек алыс-жақын шет елдерге жүк жөнелте бастады
Ақтөбе облысы бойынша меншікті тілші
Жіңішке станциясы ТМД елдерімен қатар, Америка, Жапония, Германия, Ресей, Израиль секілді елдердің алпауыт компанияларымен байланыс орнатып, жүк жөнелту жұмыстарын тиімді ұйымдастырып отыр. Бірінші класты станция Ақтөбе рельс-арқалық зауыты, Ақтөбе ферроқорытпа зауыты, Ақтөбе хром қоспалары зауыты, «Синойл» компаниясы секілді ірі жүк жөнелтушілермен жұмыс істейді. Станцияда алты айдағы тиеу-түсіру жұмыстарының жоспары әдеттегідей артығымен орындалды. Алты айда Жіңішке станциясынан 692 285 тонна жүк тиеліп, 11 341 вагон жүк жөнелтілген. Оның ішінде құрылыс материалдары 3456 вагон, қара металл 3018 вагон, химиялық өнім 809 вагон, мұнай 26 вагон, астық 91 вагон, металл сынығы 670 вагон жөнелтілген. Станция басшысы Талғат Сағыновтың айтуынша, мұнда 50-ден аса кірме жол бар.
«Станция алыс жақын мемлекеттерге, соның ішінде Америка, Жапония, Германия, Израиль, Ресей секілді елдердің алпауыт компанияларына, ТМД елдеріне жүк жөнелтеді. Жұмыстардың барлығы халықаралық талаптарға сай. Қауіпсіздік толық сақталған», – дейді станция басшысы.
Станцияда металл сынығын жөнелту 155,5 пайыз, химиялық өнімдер 114,9 пайызды құраған. Түсіру жұмыстарының жоспары 104 пайызға орындалды. Оның ішінде қара металл, металл сынығы, құрылыс бұйымдарының жоспары артығымен орындалды. Басқа өңірлерден негізінен күкірт, руда, кокс, известь, сода, құйылмалы тауарлар әкелінген. Сонымен қатар, Жіңішке станциясына қарайтын Қызғалдақты станциясындағы жүк жөнелту жұмыстары 114 пайызға орындалды. Соның ішінде қара металл мен металл сынықтарын тасымалдау жұмыстары артығымен орындалған. Ал станциядағы алты айдағы түсіру жұмыстары 106 пайызды құраған. Жүк тасымалының артуына тиімді транзиттік тасы- малда қолданылып жатқан заманауи логистикалық әдістер әсер етіп отыр.