Тұрғындар қауіпсіздігі үшін станция мен ауыл арасына жолүсті көпір салынды

Түбек теміржолының Сай- Өтес станциясы мен станцияға жақын маңдағы ауыл арасында қатынайтын тұрғындар енді теміржол үстімен еш алаңсыз, қауіп-қатерсіз, емін-еркін өте алады. Себебі, станцияда теміржол үстімен жаяу жүргінші көпірі салынды. Жаңа нысан халық игілігіне таяуда берілмек. Бұл, әсіресе, осыған дейін шектеу ша- раларына қарамастан жанын шүберекке түйсе де жолды қысқарту үшін теміржол үстімен тіке кесіп өтетіндер үшін жақсы жаңалық болды. Енді олар да қауіпсіз, теміржолшылар да жолдан өткен-кеткенді торуылдап, қауіпсіздік үшін әркімге жеккөрінішті болмайды. Құрылысты Маңғыстау ауданы әкімінің тапсырысы бойынша «АқжолҚұрылыс» ЖШС жүргізді. Көпірдің жобасы «Қарақұдықмұнай» мұнай компаниясының әлеуметтік жобалары негізінде жүзеге асты. Көпір құрылысы шілде айында басталып, тамызда аяқталды. Қазір нысан тапсыруға дайындалуда, таяу күндері қолданысқа толықтай берілетін болады. – Көпір алты жолдың үстінен, теміржол вокзалы мен вагондарға техникалық қызмет көрсету ғимаратының арасынан өтеді. Ол жерден негізінен Сай-Өтес станциясы мен Толыбай ауылы арасында қатынайтын тұрғындар өтетін. Ойын балалары да екі ортада көп жүреді. Жүк пойыздары станция жолдарында тұрған уақыттарда балалар соның астынан да өтіп кететін. Ертеректе пойыз қозғалып кетіп, қалың қардың кесірінен жолдан дер кезі өте алмай қалған екі бала мүгедек болып қалған еді. Сондықтан, жаяу жүргіншілер көпіріне бәріміз қуанып жатырмыз, – дейді Сай-Өтес станциясының басшысы Ерлан Нұрмолда.