Қандыағаш вокзалында қауіпсіздік шараларына арналған үш күндік рейд өтті

Қандыағаш теміржол вокзалы маңында құқықбұзушылық пен қайғылы жағдайдың алдын алу мақсатында «Тоқтаңыз! Басып кету қаупі бар!» рейді өтті. Шараға вокзал қызметкерлері, Қандыағаш станциясының желілік полиция қызметкерлері және еріктілер қатысты. Қауіпсіздік рейді үш күн бойы өтті. Басты мақсат – вокзал аумағындағы қауіптің алдын алу, қоғамдық тыныштықты қамтамасыз етіп, түрлі бұзақылықты болдырмау.

«Шара кезінде вокзал қызметкерлері желілік полиция қызметкерлерімен бірлесе күту залы мен перронды аралап, жолаушыларға қауіпсіздік ережесі жазылған парақшаларды таратты, адамдардың теміржолды кесіп өтерде қауіпсіздік ережелерін сақтап жүруі ескертілді. Сонымен қатар елдегі пандемия жағдайына байланысты жолаушылардан бетперде тағу, арақашықтықты сақтау тәртібі талап етілді. Халыққа қызмет көрсету орны болғандықтан вокзал айналасы барынша қауіпсіз болуға тиіс», – дейді Қандыағаш вокзалының басшысы Жанна Иманова.

«Тұрақты түрде жүргізілетін іс-шараларға қарамастан елімізде теміржол көлігін шұғыл тежеу, жылжымалы құрамның адамдар мен малды басып кету оқиғалары жалғасуда. Сол себепті азаматтар теміржол көлігі ай- мағында қауіпсіздік ережелерін қатаң сақтап, өз өміріне және теміржол көлігіне қауіп тудырмау керектігін есте сақтағандары абзал. Теміржол – қауіпті, ол қателікті көтермейді», – дейді Қандыағаш станциясы ЖПБ бастығының бірінші орынбасары Ержан Сырлыбаев. Қандыағаш вокзалында жолаушыларға арнап профилактикалық сұхбаттар да жүргізіліп, халықты темір жол объектілерінде қауіпсіздік шараларын сақтау мен қырағылықты көтеру және теріс қылық іс-әрекеттерді жасамауға шақырып, танымдық брошюралар үлестірілген.