Маңғыстауда өрт сөндіру мамандарын машықтандыратын оқу-жаттығу өтті

Соңғы кезде жер-жерде бұрқ ете қалған өрт оқиғалары жиілеп кетті. Сондықтан темір жолдың өрттен қорғау қызметтері де «етек-жеңдерін» жиып, сақтық шараларын күшейтті. Жуырда Маңғыстау станциясындағы 42-тұйықта мұнайы бар цистернадан өрт шықты. Жағдай дереу тиісті орындарға хабарланып, өртке қарсы құрылымдар шұғыл түрде оқиға орнына жетті... Бұл Маңғыстау станциясында өткен өртке қарсы кезекті тактикалық оқу-жаттығу болатын. Сценарий бойынша түскі сағат 12.00 уақытында станция тұйығындағы мұнай тиелген №53872768 цистернада «өрт шыққаны» туралы хабарланды. 10 минуттың ішінде Маңғыстау станциясындағы өрт сөндіру пойызының жеке құрамы жиналып, оқиға орнына келіп жетті. Сағат 12.03 минут өткенде әрқайсысында алты адаммен өртке қарсы мұздай қаруланған бір АЦ-8-40 "Урал", АЦ-5-40 "Урал", АЦ-2,5 "Зил" және Мұнайлы ауданының №5 өрт сөндіру бөлімінің бастығы бастаған АЛ-37 "Камаз" арнайы техникалары дайын болып, жеті минуттан соң жедел іске кірісті. Сағат 12.15-те облыс орталығынан АЦ-8-70, АЦ-3,2-40 "Камаз" өрт сөндіруші автокөліктері көмекке келіп, өртті ауыздықтауға жұмыла кіріскен арнайы техника мен мамандар бірнеше минуттың ішінде қызыл жалынның бетін қайтарды. – Өртті өшіруге су мен көбік қолданылды. Жауынгерлік қанат жаю арқылы бір жақтан су, екінші жақтан көбік шашып, өрт толықтай сөндірілді. Өртті сөндірудің жалпы уақыты 18 минутқа созылды. Оған өрт сөндіру пойызының жеке құрамынан 10 адам, сондай-ақ жергілікті теміржол мекемелерінен 11 адам қатысты. №5 өрт сөндіру бөлімінен 21, қалалық өрт сөндіру бөлімшесінен 15 өрт сөндіруші болды. Барлығы 86 адам жұмылдырылды. Өртті өшіруге 7560 литр су, 56,7 көбік және техникалардың жүруіне 10,8 л. АИ-92 жанармай кетті. Оқу-жаттығу барысында қажетті құрылымдардың дайындығы пысықталып, мүмкіндігі көрінді. Жалпы, аталған іс-шара ойдағыдай, қателіксіз өтті, ең бастысы құрамның жылдамдығы мен сақтық әрекеті назарға алынды, – дейді Маңғыстау өртке қарсы қызмет жасағының бастығы Қайырхан Таласов.