KTZ HSE қосымшасының көмегімен Арыс теміржолшылары 37 қауіптің бетін қайтарды
Шымкент қаласы бойынша меншікті тілшісі
Қазіргі таңда Арыс станциясының теміржолшылары KTZ HSE мобильді қосымшасын қолдануды жаппай үйреніп келеді. Ал жұмысшылар кез келген мәселені қосымша арқылы тез шешуге болатынына, оның тиімді де ыңғайлы екеніне көз жеткізуде, деп хабарлайды Rail-news.kz. Арыс станциясының еңбек қорғау инженері Базаркүл Махметова KTZ HSE мобильді қосымшасының артықшылықтарын түсіндіріп берді. Айтуынша, бұрын қосымшадағы кейбір мәселелерді тек басшылық шешсе, қазір жұмысшылар да орын алған мәселені шешуге атсалысып жатыр. «Мысалы, бір теміржолшы «ана жерде анадай, мына жерде мынадай болып тұр» демейді. Жұмыс орнында қандай оқиға орын алғанын суретке түсіреді де, атқарушы адамға жібереді. Айталық, дәріхана қобдишасында дәрі-дәрмек жоқ, кем болып жатса, факт ретінде суретке түсіріп жібереді. Мен ол суретті аламын да «мына жерді жаңарту керек» деймін. Дәріхана қобдишасы жаңартылған соң «ауыстырылды» деген жаңартылған суретті жіберемін. Мобильді қосымшаға кіретін әркімнің өз паролі болады. Таяуда маған бір сигналист арнайы жұмыс киімінің жыртылып қалғанын көрсетті, оны суретке түсіріп алып атқарушыға жібердім. Кейін ол сигналистің киімі ауыстырылған соң жаңа киім киген түрін түсіріп жібердім. Қосымшада «бұл жұмыс орындалды» деп шығады. Керемет емес па? Станцияда 315 жұмысшы бар, барлығына да осы қосымшаны қолдануды үйретіп жатырмыз. Бір сөзбен айтқанда, бұл «дейін» және «кейін» деген сияқты алгоритммен жұмыс жасайды. Қосымшада «молния» белгісімен келіп тұратын ақпараттарды кіріп таныссаң көк түс, таныспасаң қызыл түсте тұра береді. ҚТЖ компаниясында қандай жаңалықтар болмасын әрбір теміржолшы өз телефоны арқылы кіріп біліп отыратын мүмкіндік жасап қойған. Бұл бәрімізге өте ыңғайлы», – дейді инженер Базаркүл Махметова. Айта кетейік, осы жылдың жеті айында KTZ HSE мобильді қосымшасында ішкі бақылаудың 42 тексерісі жүргізіліпті. Анықталған ескертулер бойынша, яғни мобильдік қосымшада ішкі бақылау жүргізу барысында анықталған сәйкессіздіктерді жою бойынша түзету іс-қимылдарының жоспары жасалған. Бұдан бөлек, жыл басынан бері станцияда стандартты емес жағдайларды әрекет етуді қарастыратын 37 іс-әрекет диалогы өткізілген. Тексеру барысында 37 қауіпті жағдай анықталып, орындалды. Жалпы анықталған сәйкессіздіктерді жою бойынша түзету іс-қимылдарының жоспары жасалып, бір тәртіптік жаза қолданылған. Сондай-ақ, еңбекті қорғау жөніндегі нормативтік актілер әзірлеу, қайта қарау бойынша жұмыстар ұйымдастырылған. Еңбек қорғау инженерінің айтуынша, Арыс станциясында еңбек қауіпсіздігі және еңбекті қорғау жөніндегі 18 нұсқаулықтың барлығы қайта қаралып шыққан.