Семей Семей жүк тасымалы бөлімшесіндегі жұмыскерлер денсаулығы жіті бақылауда

«Өмір мен денсаулықты сақтаудың негізі – еңбек қауіпсіздігі» ұстанымы аясында семейліктер нәтижелі жұмыс жүргізіп жатыр. Семей жүк тасымалы бөлімшесі еңбекті қорғау бөлімінің қызметкерлері бастамасымен жыл басынан бері бірқатар айлықтар мен акциялар өткізіліп, желі бойындағы теміржолшылар толық қамтылған. Бұл орайда ақпараттандыру мен алдын алу шараларына айрықша мән берілуде. Соңғы статистикалық деректер көрсеткендей, сала қызметкерлері арасында жүрек-қан тамыр аурулары жиі тіркеледі екен. Мәселен, өткен жылы жұмыс орнында денсаулығы кенеттен сыр беру бойынша үш оқиға тіркелген. Үшеуі де жүрек ақауы, өкінішке қарай, екеуі қызмет орнында ажал құшқан. Өлімге апарып соқтырған дерт – миокард инфарктісі. Сондай-ақ, өндіріспен байланысты емес бір жарақаттану фактісі орын алған.

– Бұл жайттар теміржолшылар арасындағы еңбек қауіпсіздігі, өмір мен денсаулықты сақтау бойынша атқарылатын жұмыстарды еселеп отыр. Атап айтсақ, орын алған тосын оқиғалар бойынша ұлтық компания көлемінде жоспардан тыс инструктаждар өткізіліп, кесте бойынша бекітілген қауіпсіздік және еңбекті қорғау нұсқамалары қайта қаралды, – дейді бұл орайда бөлім- шенің еңбекті қорғау бөлімінің мамандары.

Сонымен қатар, қазіргі таңда барлық өндірістік кеңестер кезінде «қауіпсіздік минуты» өткізіліп, тосын оқиғалар бюллетендері таратылуда. Мұның сыртында өндірістік гимнастикалар спорт нұсқаушыларының көмегімен орындалады. Дегенмен бір бұл емес, аталмыш бөлім мамандары жұмыс орындарында өзін жайсыз сезінген қызметкерлердің қан қысымын, жүрек соғысын өлшеуді тұрақты жолға қойған. Бұл орайда дене қызуы көтерілген теміржолшылар жиі тіркеледі екен. Олар бірден оқшауланып, басшылықтың рұқсатымен үйіне немесе бірден жедел жәрдем станциясына жіберіледі. Шаралар нәтижесіз емес, өндірістік қауіпсіздік пен еңбекті қорғау бойынша соңғы 8 ай ішінде бірде-бір тосын оқиға орын алмаған.