Маңғыстау теміржолында күзгі комиссиялық тексеріс «Болашақ» станциясынан басталды

Маңғыстау теміржолында күзгі комиссиялық тексеріс Түркіменстанмен шекарадағы станциядан басталды. 13 қыркүйек күні күзгі тексерісті жүргізу мақсатында Маңғыстау қосалқы бөлімшесінің бастығы Нәжімеден Ғұбашов бастаған комиссия Болашақ станциясына аттанды. Комиссия құрамында жол және магистральдық желі бөлімше басшыларынан басқа ревизорлар, инженер мамандар мен бөлім басшылары бар. Олар өз салалары бойынша станциядағы барлық мекемелерді аралап, жұмыстарына тексеріс жүргізіп, қысқы мерзімге дайындығын көрді. Болашақ станциясы мен станцияда орналасқан ПЧ, ШЧ, ЭЧ, Теміржолсу, ТҚКП, вокзал, өрт сөндіру пойызы, теміржол күзеті сияқты мекемелер нысандарының жағдайы, қысқа дайындығы, іс жүргізу барысымен танысты.

– Комиссия станция жолдарын, бағыттама бұрмаларын, бағдаршамдарды, жарықшамдарды, жылудың берілуі, жұмыс тәртібін жан-жақты қарап, тексерді. Кейбір жұмыстарға қатысты ескертулер мен тапсырмалар да берілді. Енді сол аталған кем-кетікті жою үшін жұмыстанамыз. Жалпы, жылда өтетін бұл байқаудың маңызы зор, – дейді Болашақ станциясының бастығы Мақсат Нұрбеков.

Болашақтан шыққан комиссия бағытты Өзен станциясына бұрды. Бұл сапар Маңғыстау-Болашақ- Өзен-Маңғыстау бағытындағы станция, бекеттер мен мекемелерді күзгі байқаудан өткізу жоспарланған. Ал қыркүйектің 20-нан Маңғыстау -Құлсары-Тассай-Оазис-Маңғыстау бағытында байқау өтеді.