Маңғыстаудағы 50 тепловоз күзгі комиссиялық байқаудан өтеді
Маңғыстау облысы бойынша меншікті тілші
Локомотивтерді қысқы маусымға әзірлігін сынақтан өткізетін шара басталды. 10 қыркүйек пен 31 қазан аралығында күзгі комиссиялық байқауға кіріскен локомотив шаруашылығының мамандары қауырт жұмысқа жегілген, «отарбаларды» алдағы қатал маусымға сақадай сай етудің қарекетімен жүр, деп хабарлайды Rail-news.kz. Бүгінде Маңғыстау локомотив пайдалану депосының паркінде 54 тепловоз бар. 40 данасы МК сериялы, 14 ТЭМ сериялы тепловоз. Соның ішінде көлемді жөндеу жүргізілуіне байланысты 37 дана МК сериялы, 13 дана ТЭМ, барлығы 50 тепловоз күзгі комиссиялық байқаудан өтеді. Күзгі комиссиялық байқау жүргізілмейтін тепловоздар да бар. Олар – СҚК-6, ТҚК-7, ТҚК-8 жөндеуін талап етіп тұрған 2ТЭ10МК-0801 АБ, 2ТЭ10МК-0070, 0478 АБ, ТЭМ-2 7503 тепловоздары.
– Тепловоздарды алдағы қыс мезгіліне дайындау үшін күзгі тексеріс алдында депо бастығының төрағалығымен арнайы комиссия құрылып, атқаратын жұмыстар легі айқындалды. Алда қылышын сүйретіп қыс келе жатыр, сондықтан ең алдымен тасымалды қамтамасыз ететін локомотивтер үнемі жарақты күйде болуы шарт, теміржол қозғалысы тоқтап қалмауы үшін ең басты қажеттілік осы тартым күшіне байланысты. Сондықтан, локомотивтердің қыс маусымында мүлтіксіз қызметін қамтамасыз ету мақсатында біраз жұмыстар қолға алынды. Жауапты мамандар белгіленіп, тиісті міндеттер қойылды, – дейді бұл туралы ақпарат берген Маңғыстау локомотив пайдалану депосының жөндеуді бақылау бөлімі бастығы Сәбит Зияев.
Жоғарыда аталған жұмыстардан мысал келтіре кетсек, локомотивтердің құрал-саймандарын, реттеу құрылғысын «ашып-жабуға» арналған құралдарын тексеру, кабина іші, күл салғыштарды, техникалық қобдишаларды ретке келтіру, машинист кабинасын қыстық мезгілге дайындау, күзгі комиссиялық байқаудан өтіп келген локомотивтерге моторлы осьтік мойынтірек ванналарына қыстық май құюды қадағалау, тепловоздардың күзгі комиссиялық байқауға және жоспарлы жөндеуге кесте бойынша уақытында ағыту, локомотивтерінің мәденистетикалық жағдайын жақсарту, кабинаны жылытқыш колориферлерінің дұрыс істеуін қамтамасыз ету сынды жұмыстар тоқтаусыз жүріп жатыр.