Арыстық теміржолшыларда арнайы киімге мұқтаждық жоқ

Тоғыз жолдың торабындағы Арыс станциясы теміржолшылардың денсаулығын тексеруге айрықша мән береді. Ол әсіресе бүгінгідей қауіпті вирус өршіген кезде екі есе маңызды болып отыр. Станцияның еңбек қорғау инженері Базаркүл Махметованың айтуынша, күнделікті ауысым алдындағы медициналық тексеруден күндізгі және түнгі кезекшілікке шығатын 70 адам өтеді. Оның ішінде пойыз құрастырушылар, вагон қозғалысының жылдамдығын реттеушілер, станция диспетчерлері де бар. Жалпы, жарты жыл ішінде кесте бойынша 212 қызметкер медициналық тексеруден өткен, «Д» есебінде 16 қызметкер тұр. Сонымен қатар, станция теміржолшылары арнайы киіммен толық қамтылды. 102 жұп былғары бәтеңке, 85 резеңке етік, 500 дана сигналдық кеудеше, 167 жиынтық костюм, 167 төмен температурадан қорғауға арналған киім, 84 жылы етік, 167 судан қорғауға арналған плащ, басқа да қолғап пен құлақшын, мақтадан жасалған күнделікті бөрік пен жазғы бас киімдер бар, тегіс алынған. Станцияда жұмысшылар үшін жуынып-шайынатын 3 душ бөлмесі жұмыс істейді. Сондай-ақ, әкімшілік ғимаратқа, технологиялық орталық пен дөңес бекетіне қағазды, пластикті және шыны ыдыстарды бөлек-бөлек сақтау үшін арнайы контейнерлер орнатылған. Ал жұмыс кабинеттеріне қағаз қалдықтарына арнайы қораптар қойылған. Еңбек қорғау инженері есепті кезеңде станцияда 8,452 тонна металл сынықтары жиналып тапсырылғанын айтты.

«Станция аумағында қоқыстарды уақытында тазарту, шөптерді жұлу жұмыстары тұрақты жүргізіліп тұрады. Өрт қауіпсіздігі бойынша тоқсан сайын өрт дабылының, өрт сөндіру құралдарының, электр қауіпсіздігінің және т.б. жай-күйі тексеруден өтеді. Былтыр 43 дана өртке қарсы құрал-саймандарға техникалық қызмет көрсетіліп, өрт сөндіргіштер қайта зарядталды», – деді Б.Махметова.