Маңғыстауда рельстің ұрлануы күйіп тұрған мәселелердің бірі

Жолға шығып қозғалыс қауіпсіздігіне кедергі келтіретін мал мен жаннан бөлек теміржолшылардың «бас ауруына» айналған тағы бір мәселе бар. Ол – теміржол мүлкінің қолды болуы. Әсіресе, жүк және жолаушы пойыздары өтетін магистраль бойынан материалдар ұрлайтындардың тірлігі халыққа жасалған қастық демеске лаж жоқ… Түбек теміржолында биылғы жылы жолдың рельсі ұрланған жағдай тіркелді. Бұл дерек Маңғыстау жол дистанциясының аумағында Жетібай станциясы мен Өзен аралығында 128-шақырым алтыншы пикетте орын алды. Онда салуға дайын тұрған Р65 типті 25 метрлік рельсті оңай ақша тапқысы келген қаскүнемдер алып кеткен.

– Маңғыстау жол дистанциясы бойынша биыл сегіз айда бір ұрлық оқиғасы тіркелді. Шығыны – 53 305 теңге. Өткен жылы осы кезеңде үш ұрлық болған. Биыл халықпен кездесіп, түсінік жұмыстарын жүргізудің нәтижесінде мұндай факт азайды. Дегенмен, бір оқиға болса да, анау-мынау емес, 25 метрлік рельсті қолды еткендерге сөз жоқ. Жолаушылар пойызы жүретін учаскелерде теміржол мүлкін ұрлау – террористік әрекетпен парапар. Теміржолмен жолға шықпайтын адам кемде-кем. Ол жолмен сіздің жақындарыңыз, отбасыңыз жүреді. Сондықтан, өзіміз ішетін құдыққа өзіміз түкірмейік деп тұрғындарға ескертумен келеміз. Ұры алыстан келмейді, сол төңіректі білетін, көріп жүргендер, – дейді Маңғыстау жол дистанциясының жетекші инженері Мұхтар Кульчанбаев.

Оның сөзіне сүйенсек, жалпы еліміз бойынша жыл басынан бергі сегіз айда жол шаруашылығында жолдың жоғарғы құрылысының элементтерін ұрлаудың 11 жағдайы тіркелген. Соның ішінде алтауы Жамбыл жол дистанциясының Ақыртөбе-Ақшолақ, Малдыбай-Ақыртөбе аралықтарында, Жамбыл станциясы аумағында болған. Бесеуі Қарағанды жол дистанциясының Жаңа-Ауыл-Көкпекті- Қарағайлы территориясында болған.