Шиелі станциясында күзгі комиссиялық тексеру жүргізілді

Қызылорда жол және магистральдық желі бөлімшелерінің басшыларынан құрылған топ күзгі комиссиялық тексеруден өткізуде. Компанияның стандартты талаптарын орындау, теміржолдың тұрақты жұмысы мен пойыздардың қозғалыс қауіпсіздігін қамтамасыз етіп, магистральдық желі инфрақұрылымын қолдануда нормадан ауытқуларды жою және саланың қыс маусымындағы мінсіз жұмысын қамтамасыз етуді көздейтін дәстүрлі шара аясында шаруашылық түгел сүзгіден өтіп, теміржолшылар ахуалы да назардан тыс қалмады. Бөлімшенің оңтүстігіндегі Шиелі станциясына келген топ жұмысты бастап кетті. Қозғалысшылар станциядағы ғимараттар мен жұмыс орындарының, кезекшілер таблосының жағдайымен танысып, мамандармен пікірлесті. Локомотив және вагон пайдалану депосының, байланыс, электр, жол шаруашылығы дистанцияларының басшылары, «Қазкөліккәсіп» ҚБ филиалы төрағасы Бауыржан Ахметов, бөлімшенің кадр бөлімі басшысы Жанар Ибрагимова, кәсіподақ ұйымы төрағасы Мұхтар Көпірбаев станциядағы теміржолшылардың жағдай- ымен танысты. Бөлімше басшысының орынбасарлары, ревизорлық аппарат тобы мекемелердегі техникалық құжаттардың толтырылуы, көлік қызметін пайдаланушылармен келісім деңгейін сарапқа салды. Жалпы жылжымалы құрамдардың қозғалыс қауіпсіздігін сақтау шараларын арттыру, сол шараларды іске асыратын теміржолшының жағдайына көңіл бөлуге басымдық берілгені байқалды. Мәселен, кадр бөлімінің басшысы теміржолшыларға компания тарапынан берілетін әлеуметтік жеңілдіктер мен сауықтыру орындарына берілетін жолдама жайлы түсіндірді. Жүк тасымалы бөлімшесінің директоры локомотив депосында тепловоздардың күтімі, жанар-жағар майдың үнемделуіне, тасымалдың оңтайлы ұйымдастырылуының үлестірілуіне, тіпті жұмыс орнының ішкі-сыртқы тазалығына дейін мән беріп, жұмысшыларға қолайлы жағдай жасалуын назарға алды. Сонымен қатар, ғимараттардың техникалық жайы, өндірістік және еңбек тәртібінің ахуалы, жасанды құрылыстар мен желілік құрылым нысандары да сыннан өткізіліп, жол сапасы тексеруден өткізілді. – Осыған дейін бөлімшенің солтүстігіндегі учаскелерді тексеруден өткізген комиссиялық топ ендігі кезекте Қызылорда станциясы мен айналасындағы нысандарды аралап келеді. Негізгі мақсат – компания мен бөлімше басшылығы бекіткен талаптарды орындау арқылы бөлімшенің қыс мезгілінде қалыпты жұмыс атқаруын қамтамасыз ету. Комиссиялық тексеру кезінде күнделікті атқарылатын шаралармен қатар назарға алынған олқылықтарды сараптап, кем-кетікті қалпына келтіру, персоналдың білімі мен білігін тексеру, жұмыстың сапалы орындалуына қойылатын талап көзбе-көз ескертілді, – деді бөлімшенің техникалық бөлімінің басшысы Жарқынбек Рсымбетов. Күзгі байқау аймақта қазан айының алғашқы онкүндігіне дейін жалғасады.