Теміржолдағы санитариялық-эпидемиологиялық басқарма электронды форматта қызмет көрсетеді
Маңғыстау облысы бойынша меншікті тілші
Бүгінде теміржол көлігіндегі санитарлық талаптардың сақталуын қадағалаушы мекемелер қызметі жетілдірілген. Ең бастысы, қағазбастылық қысқарып, көп жұмыс электронды түрде атқарылатын болды. Маңғыстау бөлімшелік көліктегі санитариялық-эпидемиологиялық бақылау басқармасының басшысы Ағзия Темірқасованың айтуынша, бүгінде ҚР Денсаулық сақтау министрлігінің Санитариялық-эпидемиологиялық бақылау комитеті және оның аумақтық бөлімшелері «электрондық үкімет» www.egov. kz, www.elicense.kz веб-порталы арқылы көрсетуде. 2020 жылдан бастап осы кезеңге дейін өңірдегі жолаушылар тасымалымен айналысатын «Сары-Арқа Компани» ЖШС, «Жолаушылар тасымалы» АҚ «Батыс» жолаушылар тасымалы жөніндегі аймақтық филиалына, «Отпан-Логистик» ЖШС қарасты 88 жолаушылар вагонына, нормативтік құқықтық актілерге сәйкестігі туралы санитариялық-эпидемиологиялық қорытынды беріліп, мемлекеттік қызметтің барлығы электронды түрде көрсетілген.
– Бұрын жүк пойыздарын тексеру санитарлық-карантиндік пункті тек Бейнеу станциясында болатын. 2012 жылдан бастап екі мемлекет арасындағы Болашақ станциясында жүк пойыздарын қабылдау үшін техникалық процестердің ережесі бекітіліп, санитарлық-карантиндік бақылау пункті ашылды. 2018 жылдан бастап санитарлық-карантиндік бақылау пункті Құрық портында да жұмысын бастады. Жыл басынан бері бақылау пунктінен 8136 жүк вагоны, 2777 партия жүк бақылау жасалып өткізілді. Шекарада 12 936 жолаушы тексерілді. Бұл пункттердің бәрі арнайы құрал-жабдықтар, уақытша оқшаулау бөлмелері, қашықтықтан жолаушылардың дене қызуын өлшейтін құралдармен жабдықталған, – дейді Ағзия Темірқасова.