Семейдегі ЖТ бөлімшесінің қызметкерлері қысқы арнайы киіммен толық қамтылды
Абай облысы бойынша меншікті тілші
Семей ЖТ бөлімшесі бойынша алдағы қысқа даярлық шаралары аяқталуға таяу. Атқарылған көп жұмыстың арасында теміржолшыларды қызметтік қысқы жылы киімдермен қамту ерекше орын алады. Бөлімшенің еңбекті қорғау бөлімінің бастығы Сәкен Жұмаділовтің айтуынша, қыркүйектің соңғы жұмыс күні бойынша арнайы киім, қыстық аяқ киіммен қамту ісі 100 пайызды құрады. Арнайы киімдерді шаруашылық бөлімінің мамандары желі бойындағы барлық мекемелерге жеткізіп берді. Қазіргі таңда жел өтінде жүретін станциялар қызметкерлері, жолшылар, ТЧЭ-25, ТЧЭ-24 локомотившілері мен ВЧД-23 вагон қараушылары күннің күрт суытуына байланысты арнайы киімдерді қолдана бастады. Жалпы, қысқы киімдерді сатып алу бойынша арнайы мекемелермен ұзақ мерзімді келісімшарт жасалған болатын. Яғни, ағымдағы жылдың наурыз айындағы келісім бойынша енді екі жыл аралығында Жамбыл облысындағы «ТаразКожОбувь» ЖШС, сонымен қатар «Қарағанды аяқкиім фабрикасы» ЖШС, ПКК «Арго» ЖШС теміржолшыларға қажетті маусымдық киімдерді дер кезінде жеткізіп тұрады. Қазіргі таңда ерлер мен әйелдерге арналған, сапалы былғарыдан тігілген қызметтік киімдер қолданысқа енгізілген. Бұрынғы жылдардағыдай емес, ашық далада, күн мен желдің өтінде жүретін теміржолшыларға берілетін қызметтік киімдер сапалы, жылы. Өз өлшемдеріміз бойынша таңдап киюге мүмкіндік бар. Басшылық қажеттіліктерімізді үнемі сұрап тұрады, – дейді Семей вагон пайдалану депосының аға вагон қараушысы Болатқали Баймұханбетов. Сонымен қатар, бөлімше бойынша тазалық және санитарлық залалсыздандыру заттары да жеткілікті мөлшерде алынған. Мәселен, осыған дейін мүгедектердің «Заман» ұйымымен жасалған келісімшарт аясында медициналық қолғаптар толық көлемде жеткізілген болса, қазіргі күні «Ардагер-М Company» ЖШС жүз литр антисептикті барлық теміржол мекемелеріне жеткізіп берген. Қызметтік киімдермен қамту бойынша теміржолшылар тарапынан шағым тіркелмеген.