Тәуелсіздікке арналған марафонға қатысқан семейлік теміржолшылар жүлдегер атанды
Абай облысы бойынша меншікті тілші
Тәуелсіздік мерейтойына орай «30 күнге 30 шақырым» атты кәсіподақ марафонына Семей ЖТ бөлімшесінің атынан қатысқан бірқатар желаяқ теміржолшылар жүлдегер атанды. Жақында оларды ел шығысына жасаған сапары аясында «Қазкөліккәсіподақ» ҚБ төрағасы Оразғали Ахметбаев арнайы құттықтады, деп хабарлайды Rail-news.kz. Оразғали Төлепбекұлы Қазақстан Тәуелсіздігінің 30 жылдығына арналған іргелі шарада жеңіске жеткен Болатбек Шутиковты, Сәуле Асқарова мен Нұрлан Бегәділовті арнайы дипломдармен марапаттап, медаль тақты. Ол өз сөзінде, қоғамдық шаралар ұйымдастыруда, сонымен қатар, отандық теміржол саласының игілігі жолында семейлік кәсіподақ қызметкерлерінің аса белсенді екенін айтты.
«Семей ЖТ бөлімшесі кәсіподақ ұйымының төрағалары теміржолшылар арасында түрлі іс-шаралар өткізіп, еңбек қатынастарын реттеуде, кәсіби және спорттық салада белсенді өмір салтын қалыптастыруда зор жетістіктерге жетуде. Жергілікті кәсіподақ ұйымының төрағасы Алик Досановтың биылғы теміржолшылардың төл мерекесінде Құрметті теміржолшы атағын алуы, кешегі марафонда үздік атанған үш жеңімпаз – сөзіміздің айқын дәлелі», – деді ол.
Осыдан соң астаналық мейман желі бойындағы мекемелердің кәсіподақ жетекшілерімен жиын өткізіп, бірқатар өзекті мәселелерді талқылады. Сауал-жауап алмасып, қызмет барысы бойынша әңгімелесті. Сондай-ақ, бөлімшедегі қайта жаңарып, жабдықталған «Психологиялық жеңілдену бөлмесін» көріп, жоғары баға берді, Семей вокзалында орналасқан Түрксіб мұражайының жәдігерлерімен де танысты.