Маңғыстауда теміржол кәсіподағының өңірдегі өкілдері бас қосты
Маңғыстау облысы бойынша меншікті тілші
10 қазан – ҚР Кәсіподақтар күніне орай Маңғыстауда теміржол кәсіподағының өкілдері «Кәсіподақ ұйымы – ұжым ұйытқысы» атты семинарда бас қосты. Семинарды теміржолшылар кәсіби одағы орталық кеңесінің Маңғыстау аймағы бойынша өкілі Әзірбай Тұрмағанбетов ашып, әріптестерін құттықтады. Ол өз сөзінде өңірдегі кәсіподақ ұйымдарының атқарып жатқан жұмыстарына тоқталып, түбекте 4,5 мың кәсіподақ мүшесі, 15 өндірістік кеңес, 40 техникалық инспектор бар екенін атап өтті.
– Теміржолдағы оңтайландыру мәселесінде еңбек адамының құқығы сақталуы кәсіподақ назарында. Жалпы, еңбек қаты- насы, әлеуметтік көмек сияқты басқа да мәселелер біздің үнемі бақылауымызда. Мәселен, өткен жылы локомотив деполары бойынша 14, биыл 6 машинист 57 жасқа толған бойда демалысқа жіберілді. Олар қазір зейнеткерлік жасына келгенге дейін салалық жәрдемақы алып отыр. Еңбек қорғау жайында да ұйым қоғамдық бақылауды нығайтып, жұмысшыларға қауіпсіздік, еңбек жағдайын жасау, денсаулық сақтау, өндірістік жарақаттарды азайту, жазатайым оқиғалардың алдын алуға жұмыс істеп жатыр, – деген Әзірбай Тұрмағанбетов кәсіподақтың араласуымен шешімін тапқан және кезек күтіп тұрған мәселелерге тоқталды.
Солардың қатарында, Болашақ станциясында жалғыз медбикеден басқа, дәрігердің жоқтығы, жедел жәрдем көлігінің қажеттілігі, станциядағы 170 пәтер мен Жаңаөзеннің «Рауан» шағын ауданында 38 пәтерде тұрып жатқан теміржолшылардың үйді жекешелендіру туралы сұранысы күн тәртібінде тұрғанын жеткізді. Бұдан кейін семинарға қатысушыларға Маңғыстау локомотив депосының кәсіподақ ұйымының төрағасы Әбілсейт Нәбіханов 2021-2023 жылдарға арналған ұжымдық шарттағы өзгерістер мен толықтырулар туралы егжей-егжейлі айтып берді. Маңғыстау магистральдық желі бөлімшесінің еңбек қорғау инженері Тілектес Қондыбаева өндірістік кеңестің жұмысы және еңбек қауіпсіздігі, еңбекті қорғау жөніндегі техникалық инспекторлардың рөлі, техникалық инспекторларды оқыту, біліктілігін көтеру жайында әңгімеледі. Сонымен қатар Орталық кеңестің түбектегі өкілі еліміздің еңбек туралы заңнамасы мен кәсіподақтың жарғысы мен басқа да нормативтік құжаттары туралы мағлұмат берді. Жиын соңында кәсіподақ жұмысын жүргізу бағытында еңбек етіп және оған атсалысып жүрген бірқатар теміржолшы марапатталды. Оларға «Қазкөліккәсіп» ҚБ төрағасының және аймақтағы өкілінің алғыс хаттары мен ақшалай сыйақысы табысталды.