Шығыстағы тұтынушылар тұрақты бағада көмірмен қамтылуда

Ел шығысында көмір тапшылығы жоқ. «ҚТЖ» ҰК» АҚ-ның өз міндеттемелерін жауапкершілікпен атқарып, көмірдің уақытылы жеткізілуіне байланысты қатты отын бағасы да көтерілмеген, деп хабарлайды Rail-news.kz. Бұл туралы жуырда Семейдегі аймақтық коммуникациялар қызметінде болып өткен баспасөз мәслихатында белгілі болды. Семей ЖТ бөлімшесі басшысының логистика бойынша орынбасары Болат Оразтайұлының айтуынша, қазіргі таңда Қаражырадан көмір тиеу белгіленген жоспар аясында жүйелі түрде жүргізілуде. Бұл ретте теміржолшылар бір ғана Шығыстағы тұрмыстық-коммуналдық саланы толықтай қатты отынмен қамтып отыр. Білім беру мекемелерінің, өзге де әлеуметтік нысандардағы қатты отын қоры – 100 пайыз. Алдағы қыс қаһарлы болады деген болжам бойынша қосымша тапсырыс беріп жатқан мекемелер де бар. Бөлімшені логистика және жүк тасымалын ұйымдастыру бөлімі мамандарының есебінше, аймақтағы көмірдің қажеттілігі бір жылу маусымына 3 900 000 тонна екен. Бұл орайда бүгінгі күндері Дегелең станциясындағы тоқтаусыз техникалық процесс нәтижесінде қажеттіліктің 99 пайызы даярланған. Ал, өткен қыркүйек айының басынан бастап жеке тұрғындарға қажетті көмір барлық тұйық теміржол желілеріне үзіліссіз әрі толықтай жеткізіле бастаған болатын. Қазіргі таңда Семейдегі төрт тұйық желіде жеткілікті мөлшерде көмір қоры бар. Бұл орайда бөлімшенің басты әріптестері саналатын «Жігер» ЖШС мен «Семей көмір» ЖШС қатты отынның техникалық және сұрыпталған түрлерін саудалауда. Бағасы 9 500-ден басталады. Әрбір теміржол тұйығының тәулігіне 17-19 вагон көмір түсіруге мүмкіндігі бар. Сондықтан да болар, әлеуметтік көмірді есептемегенде, бүгінде қатты отынға кезек әлдеқайда азайған. Қазіргі таңда ел шығысында халыққа көмір бағасы мен маркаларын, сатылатын жерлер мен оларда көмірдің бар-жоғын түсіндіріп, тиісті ақпарат беріп отыратын арнайы «жедел желі» құрылған. Яғни, көмірдің жеткізілімі мен сапасына қатысты тұрақты мониторинг жүргізілуде. Бүгінгі көрсеткіш бойынша қарастырсақ, ел шығысындағы теміржол тұйықтарында 16,8 мың тонна көмір бар екен. Оның ішінде Өскеменде –1 мың тонна, Семейде – 7,8 мың тонна, Риддерде – 32 тонна, Аягөз ауданында – 5 мың тонна, Жарма ауданында – 800 тонна, Алтай ауданында – 1,3 мың тонна, Шемонаиха ауданында – 770 тонна. Осы орайда қазан айының басында тек Өскемен қаласы бойынша ғана көмір қажеттілігінің артқаны байқалған. Алайда, облыстық тұрғын үй-коммуналдық шаруашылық басқармасы ҚТЖ басшылығына қосымша вагондар бөлгізу туралы ресми хат жолдап, бұл мәселе бүгінде шешімін тауыпты. Бүгінгі күні орта есеппен алғанда Дегелең станциясынан көмір тиелген төрт пойыз тұрақты түрде жолға шығарылуда. Жылжымалы құрамдардың барлығы да ауыр салмақты болғандықтан пойыз құрастыру ісі біршама күш салуды талап етеді. Салмағы 6 200 тонналық 63 вагоннан тұратын жылжымалы құрамдар қозғалысында кедергі жоқ. Барлық жүк станцияларындағы маневрлік жұмыстар жеделдетілген түрде жүзеге асырылады. Локомотив пен вагон тапшылығын болдырмау мәселесі бөлімше басшысының қатаң назарында тұр.