Күш біріктіретін күн туды
Шымкент қаласы бойынша меншікті тілшісі
Шымкент темір жолының жастары еріктілер жылы басталғалы талай игі істерге мұрындық болды. Ал қазіргі таңда бүкіл әлемді дүрбелеңге салған коронавирус пандемиясы шыққалы жастар белсенділігі екі есе артып отыр.
Себебі, шын мәнінде қайрат қылар, күш біріктірер күн енді туды деп санайды олар.
Шымкент бөлімшесінің жастар ісі жөніндегі кеңесінің аймақтық өкілі Ердос Әлішер бастаған еріктілер тобының қатары соңғы айда бірнеше есеге өсіпті. Теміржолшы-жастар осы аптада қала әкімшілігінің қолдауымен 4 бірдей мөлтекауданда 20 мың дана бетперде мен иммунитет көтеретін аскорбин қышқылын таратқан.
Сонымен қатар, жастар өз алдына қаржы жинап, көпреттік 300 маскаға тапсырыс беріп, 500 маска қалалық әкімшіліктен алып, ауысыммен жұмыс істейтін теміржолшыларды аралап жүріп 800 маска таратқан. Олар Шымкент, Қазығұрт, Қызылсай, Жетісай станцияларынан бөлек, қаладағы вокзал шаруашылығы, жолшыларға, тауар кассирлеріне екі-екеуден көп реттік маскалар мен короновирустан қорғану ескертпесін таратты. Ал теміржолшыларды антисанитариялық заттармен Шымкент ЖТ бөлімшесінің кәсіподақ комитеті қаржыландырып отыр.
Жастар ісі кеңесінің бір тобы бүгін Арыс пен Қазығұрт ауданы жақта орналасқан блокпосттарға барып, әскери қызметшілер мен медицина мамандарына ыстық тамақ таратса, ерікті жастардың екінші тобы Шымкент станциясында еңбек ететін жалғызбасты ана Әлия Қалтаеваға көмектесіпті. Жеті баланың анасына азық-түлікпен қатар вирустың алдын алатын құралдар жеткізіп берген.