Шымкент теміржолының жастары соғыс ардагерлерге азық-түлік пакеттерін жеткізіп берді
Шымкент қаласы бойынша меншікті тілшісі
Ұлы Отан соғысының 75 жылдығы қарсаңында Шымкент теміржолының жастары соғыс ардагерлеріне азық-түлік салынған себеттер үлестірді. Ұлы Отан соғысының ардагерлері Петр Гончаров, Иван Борисов, Қалтай Бектасов, Халил Ергешов, Нина Мосунова, Қадыр Атажановтар кешегі қан майданды көзбен көрген санулы майдангерлер.
Аталған барлық ардагердің шаңырағына соққан жас теміржолшылар майдангер қарияларға азық-түлік үлестіріп қана қоймай, олардың қолын алып, денсаулықтарын сұрап, көңіл-күйлерін көтеріп қайтты.
Осыдан 75 жыл бұрын болған шайқастың көзі тірі куәгерлеріне құрмет көрсетіп, төтенше жағдай кезінде денсаулықтарын күтіп, індеттен абай болу керектігін ескертті. Өз кезегінде кешегі қан майданның жауынгерлері, бүгінгі ұрпақтың мақтанышы қариялар жас теміржолшыларға алғыстарын айтып, ақ батасын берді.
Олар еліміздің ертеңі жастар екенін, қазіргі әлемдік пандемия орын алса да қайырымдылық пен қолдауға ештеңенің кедергі бола алмайтынына тағы бір көздерін жеткізді.
Бұдан бөлек, теміржолшылардан құралған ерікті жастар тобы қайырымдылық іс-шараны Түркістан облысы мен қалалық шекараны байланыстыратын блокпосттарда жалғастырды. Ондағы медицина мамандары мен қауіпсіздікті сақтайтын қызметкерлерге ыстық тамақ пен сусындар жеткізді.
Сонымен қатар, қалалық əкімшілікпен келісімді түрде қаланың шеткі мөлтек аудандарына, əр отбасыға вирустың алдын алу мақсатында медициналық бетперделер таратты.