«Таза Қазақстан» акциясына теміржолшылар да үн қосты
Шымкент қаласы бойынша меншікті тілшісі
Жер-жерде өтіп жатқан «Таза Қазақстан» акциясына теміржолшылар да үн қосты. Аталған шараны өткізудегі мақсат – экологиялық жағдайды жақсарту, табиғатқа деген қамқорлықты халыққа жеткізу.
Шымкент станциясының маңайында теміржолшылар мен желілік полиция бөлімі қызметкерлері бірлесіп өткізген шарада олар адамдар көп жиналатын жерлерді аралап, табиғатты аялау, теміржол бойына бөгде заттар тастамау, зиянды қалдықтар төгіп ластамау, жағажай, демалыс аймақтарын күтіп ұстауға үндеді. Қаланың қақ ортасында орналасқан Шымкент станциясының аумағынан бөлек, су қоймаларының жағалау аймақтары, жағажайлар, демалыс орындары, табиғи саябақтарды аралап, жергілікті тұрғындар мен қалаға келген қонақтарға «Таза Қазақстан» акциясын түсіндіріп, оған әрбір адам тазалық сақтау арқылы үлес қосуға шақырды.
Шара барысында Шымкент станциясының теміржолшылары мен ЖПБ қызметкерлері азаматтарға буклеттер таратып, қоршаған ортаның ластануына жол бермеуге, егер құқық бұзған жағдайда Қазақстан Республикасының заңнамасына сәйкес жауапкершілікке тартылатынын айтып түсіндірді.