Ұлы ақын мұрасына тағзым

«ҚТЖ – Жүк тасымалы» АҚ – Жамбыл теміржол бөлімшесінің ұжымы Абай Құнанбайұлының 175 жылдық мерейтойына арналған челленджге үн қосты. 

Олар ең алдымен арнайы бейнежазба әзірлеп, бөлімше директоры Үмітбек Рысбековтің бастамасымен данышпанның «Желсіз түнде жарық ай» әнін хормен орындайды. Содан соң өндірістіктехникалық бөлімнің оқу бойынша нұсқаушысы Азамат Досжанов Абайдың рөлін сомдай отырып, бірінші қара сөзін нақышына келтіріп оқыды. Әрі қарай бейнежазба персоналдармен жұмыс істеу бөлімінің бастығы Айнагүл Нағашбектің орындауындағы «Өлең – сөздің патшасы, сөз – сарасы» өлеңімен, қозғалыс қауіпсіздігі ревизоры Медет Ошақбаевтың оқуындағы «Жасымда ғылым бар деп ескермедім» өлеңімен жалғасты...

Аса станциясының жүк қабылдап-тап- сырушысы Аина Несіпбаева оқыған «Әсемпаз болма әрнеге», логистика және тасымалдауды ұйымдастыру бөлімінің бастығы Бауыржан Устаев оқыған «Қалың елім, қазағым, қайран жұртым» өлеңімен жалғасып, Бурыл станциясының жүк қабылдап-тапсырушысы Рузана Азимова оқыған «Жігіттер, ойын – арзан, күлкі – қымбат», Жамбыл локомотив пайдалану депосының машинист-нұсқаушысы Мейіржан Орысбай оқыған «Тұлпардан тұғыр озбас, шабылса да», Жамбыл вагон пайдалану депосының нұсқаушысы Рахман Құдайберген оқыған «Есіңде ме жас күнің?», Тараз станциясының парк бойынша кезекшісі Ғалымжан Сейіт оқыған «Сенбе жұртқа тұрса да қанша мақтап», Жамбыл локомотив пайдалану депосы кадр бөлімінің бас маманы Гүлвира Нұрбаева оқыған «Жүрегім, нені сезесің?», қауіпсіздік бөлімінің бас маманы Бекжан Абдыбаев оқыған «Қасиетті дұға» өлеңдері де сәтті шықты.

Бейнежазбаның ерекшелігі сол, хакімнің шығармаларын орындаушылар қазақтың ұлттық киімдерін кисе, жалпы таспада еліміздің кең жазира даласы, алтыбақан, жылқы, киіз үй сынды ұлттығымызға тән дүниелер қолданылады.

Сонымен қатар челленджге қатысушылар қатарға тұру арқылы «175» санын бейнелейді. Жамбылдық теміржолшылар ұжымы бұл бастаманы бірауыздан іргедегі шырайлы Шымкент қаласының жол бөлімшесіне жолдады.