Шымкент ЖТ басшылығы қызылсайлық зейнеттегі теміржолшыны қарттар күнімен құттықтады
Шымкент қаласы бойынша меншікті тілшісі
Шымкент жүк тасымалы бөлімшесінің басшысы Аманкелді Арысбаев пен кәсіподақ филиалының төрайымы Нағима Салықбаева бастаған арнайы топ Қызылсай елді мекенінде тұратын зейнеткер теміржолшы Р.Жалғасбаевты шаңырағына арнайы барып, қарттар күнімен құттықтады. Бөлімше басшысы теміржолшы қариялардың теміржол саласына қосқан көп жылғы еңбектері ұмытылмайтынын айтып, отбасы амандығын, деннің саулығын тіледі. Айта кетейік, қарттар күні мерекесіне орай 15 еңбек зейнеткеріне көмек ретінде ақшалай сыйақы және шай ішуге арналған тәттілер үлестірілді. Қарттардың арасында ҰОС ардагерлері, жалғызбасты қариялар мен денсаулығына байланысты мүгедектер де бар. Шымкент кәсіподақ филиалының төрайымы Нағима Салықбаева соңғы жылдары елдегі карантиндік шектеулерге байланысты қарттардың басын қосып, жылдағыдай мерекелік дастархан басына жинауға мүмкіндік болмағанын атап өтті. Сол себепті кәсіподақ мүшелері қарттардың шаңырағына барып, сый-сияпат жасады.