Түлкібас станциясында дартс атудан жарыс өтті
"Қазақстан теміржолшысы" газетінің Жамбыл облысындағы меншікті тілшісі
Жамбыл бөлімшесі кәсіподақ филиалының спорт нұсқаушылары ұйымдастырған жарысқа ПЧ-52 Түлкібас жол дистанциясының қызметкерлері қатысты.
Дартс – жеңіл спорттық ойын саналғанымен, дәлдік пен стратегияны қажет ететін жарыс. Тарихы орта ғасырлардан басталатын дартс спорты бүгінде әлемде кең таралған. Ережесі қарапайым десек те, қатысушыдан тактика мен техниканы талап етеді. Кәсіби дартс жарыстары әлемдік деңгейде өткізіледі. Оның BDO және PDC сияқты ірі лига турнирлері бар.
– Теміржолшылар арасындағы жарыс классикалық үлгіде өткізілді. Жеңіл спорттық ойын саналса да, дартс атудан әйелдер мен ерлердің мергендігін бір санатта бағалауға болмайды. Сондықтан бәсекеде жеңімпаздар екі бөлек анықталады, – дейді кәсіподақ ұйымының спорт нұсқаушысы Евгений Тян.
Жарыс қорытындысы бойынша әйелдер арасында жетекші маман Гүлмира Жетпісбаева, жетекші инженер Татьяна Гаенко және техникалық бөлім бастығы Ғазиза Сүлейменова үздік шығып, жүлделі орындарды бөлісті.
Ерлер арасында инженер-экономист Қайсар Телеуов, электроника инженері Сегізбай Азат және есеп бөлімінің бастығы Мұхит Күбегенов мергендігімен танылып, үштікті түйіндеді.
Жарыстың жеңімпаздары мен жүлдегерлері грамоталармен, медальдармен, бағалы сыйлықтармен марапатталды.