Жігіттердің осалы жоқ

Маңғыстауда Темір жол барысы анықталды. Өңірдегі теміржол мекемелері арасында қазақ күресінен «Темір жол барысы – 2026» жарысы ұйымдастырылып, күш пен шеберлік сынға түсті.

Үш түрлі салмақ дәрежесі бойынша болған белдесуде үміткерлер қатары көп болды. Түбек теміржолының алысжақын станциялары мен түрлі мекемелерден қатысушылар келді. Жарыс теміржолшылар спорт нұсқаушыларының ұйымдастыруымен Шетпе станциясында өтті.  

Күрес қорытындысы бойынша ең жеңіл 66 келі салмақта 1-орын Жұмабай Матвафаевқа, 2-орын Ақниет Айболатұлына, 3-орын Ғарифулла Досқыловқа бұйырды. 80 келі дәрежесінде күш сынасқандар арасында 1-орынды Бауыржан Ботабаев, 2-орынды Досан Жұбандық, 3-орынды Ситқазы Қадызан алды. 80+ салмақта жас болса да күштілігімен, ептілігімен 1-орынды Мейрамбек Марханбетов, 2-орынды Еламан Асқанбай, 3-орынды Бауыржан Нұрбаев иемденді.  

Бір мекемеден екі адам жоғары жетістікке жеткендер де болды. Маңғыстау локомотив депосының, «Теміржолсу Маңғыстау» мекемесінің қос қызметкері жеңімпаздар қатарынан көрінді. Солардың бірі ауыр салмақта бірінші орын алған Мейрамбек Марханбетов Жаңаөзен айналым депосында машинист көмекшісі. Тепловоз машинисінің отбасында тәрбиеленген бес баланың тұңғышы жастайынан дзюдомен айналысқан екен, сондықтан қазақ күресінде қарсыласын аударып ұру онша қиынға соқпапты.  

«Теміржолсу Маңғыстаудың» атынан 80 келі салмақта күш сынасып, бірінші орынға жайғасқан шетпелік Бауыржан Ботабаев та көп жыл осы мекемеде еңбектеніп зейнетке шыққан әкесінің жолын жалғаған. Саладағы он бес жылға жуық тәжірибесі бар маман бала кезден спортқа біртабан жақын өскен екен.  

Осы мекеменің тағы бір қызметкері, 66 келі салмақтағы Темір жол барысы атанған – Жұмабай Матвафаев. Бүгінде КНС машинисі болып жұмыс істейтін ол да ата-анасының мамандығын жалғастырып жүр екен. Жас кезінде грек-рим күресімен кәсіби түрде шұғылданыпты. Қысқасы, жеңіске жеткен жігіттердің осалы жоқ.