Сарыағаш станциясы Орта Азиямен жүк алмасатын негізгі қақпа
Шымкент қаласы бойынша меншікті тілшісі
Орта Азияның теміржол қақпасы аталып кеткен Сарыағаш станциясының еліміздің темір жол жүйесі үшін маңызы зор.
Ел тәуелсіздігіне дейін Өзбекстан темір жолының балансында болып келген Сарыағаштың 2003 жылы Қазақстан теміржолының қарамағына өткені сол жылдардағы айтулы оқиғаның бірі болды. Ал 2005 жылы станция өзбек және қазақ теміржолы арасындағы мемлекетаралық түйісу пунктіне айналды. Жалпы, сол жылдары Шеңгелді-Сарыағаш, Пахтаарал-Жетісай учаскелері Қазақстан темір жолының иелігіне өтіп, Шымкент жол бөлімшесінің құрамына берудің ең тиімді тұсы – еліміздің мемлекеттік шекарасында жүктер мен жолаушыларды тасымалдау кезінде пәрменді шекаралық және кедендік бақылауды ұйымдастыруға мүмкіндік туды. Екіншіден, жергілікті тұрғындар үшін қосымша жұмыс орындары ашылып, өңірдегі әлеуметтік шиеленістің төмендеуіне ықпал етті. Бүгінде станцияда 240 адам еңбек етеді. Барлығы да жергілікті тұрғындар.
Қазіргі таңда Сарыағаш учаскелік шекаралық станция және кластан тыс станцияға жатқызылған, он қабылдап-жөнелту жолы бар. Жолаушылар пойызын қоспағанда Өзбекстан тарапынан келген жүк пойыздарын қабылдау және тапсыру 25 жұпты құрайды. Орташа тәуліктік вагон айналымы – 2600 вагон. Транзиттік пойыздардан бөлек, станциядан тиелетін жергілікті жүктер де бар, көбіне минералды сусын, картоп, жаз айларында қауын-қарбыз, жеміс-жидек, т.б.
Станция бастығы Нұрдәулет Байғазиев көрші ел теміржолшыларымен қоян-қолтық жұмыс істей тін шекаралық бекеттің жұмысы күрделі де қауырт екенін айтады. Өткен жылы комиссиялық айлық тексеру кезінде 1192 ескерту алып, станция басшылығы анықталған ескертулер бойынша түзету және алдын алу іс-шараларының жоспарын жасаған. Сондай-ақ, станция бастығы нормативке сәйкес пойыздар қозғалысы мен маневр- лік жұмыстармен айналысатын қызметкерлердің лауазымдық міндеттерін орындау деңгейіне бақылау жүргізу үшін 154 кенеттен кешенді тексеру жүргізген, оның ішінде 53 тексеру тәуліктің түнгі уақытында жүргізіліпті. Станцияда «Тежегіш табандық – ерекше бақылау» айлығында да тежегіш табандықтарының жоғалуы, ұрлану және ұрлану ықтималдығын болдырмау бойынша іс-шаралар өткізілді. Еңбекті қорғау бойынша «вагонның (тұтқалардың, сатылардың, алаңдардың) технологиялық жабдықтарының жарамдылығы» бойынша тексерулер KTZ HSE мобильді қосымшасына енгізіле отырып, жүзеге асырылған.