Жіңішке станция жүк тиеуде алдыңғы шепте

Ақтөбе іргесіндегі Жіңішке станциясының аты шет елге мәшһүр. Өңірдегі Ақтөбе ферроқорытпа және Ақтөбе хром қоспалары зауыттарымен тікелей байланыста жұмыс істейтін бірінші класты станциядан АҚШ, Жапония, Оңтүстік Корея, Франция, Германия, Қытай, Ресей елдеріне жүк жөнелтіледі.

Станцияда экспорт көлемі артқан. Биылғы төрт айда 18 467 вагон жүк тиелген. Экспорт сегментінде кен өнімдері басты орынға ие. Бүгінгі таңда станцияда қайнаған тірлік. Жүк тиеу-түсіру жұмыстары қарқын алған. Отандық кен өнімдері Ресейге, Өзбекстанға, Үндістанға, Польшаға контейнерлік пойыздармен жөнелтілуде екен. Жалпы, жоғарыдағы елдердің бәрі де қазақстандық өнімнің ірі импорттаушылары.

 Биыл төрт айда 18 467 вагон жүк тиелген дедік. Өткен жылдармен салыстырғанда айтарлықтай өсім бар. 2021 жылы 58 мыңнан аса вагон тиеліп, оның төрт айында 17 391 вагон жөнелтілген болатын. Ал 2020 жылы 54 мыңнан аса жүк вагоны тиелген, оның ішінде төрт айда 17 117 вагон тиелген. Биылғы көрсеткіш – 18 467 вагон, яғни төрт айда мыңнан астам вагон артық. 

Шет мемлекеттермен жүк тасымалы жұмысын тиімді ұйымдастыруда тәжірибелері қалыптасқан станцияда жұмыстардың бәрі халықаралық талапқа сай атқарылады. Қауіпсіздік шаралары толық сақталған. 67 кірме жолдың бәрі де жұмыс істеп тұр. Жіңішке станциясы бастығының логистика жөніндегі орынбасары Асылбек Садықовтың айтуынша, күніне орташа есеппен 300 вагон тиеледі. 

«Дөң станциясынан кен келеді де әрі қарай экспортталады. Күнделікті жөнелтілетін кеннен бөлек, станцияда экотон мен фатон шығаратын екі кірпіш зауыты бар. Сонымен қатар, Ақтөбе рельс-арқалық зауытының өнімдерін тасымалдайтын Қызғалдақты станциясының жұмысын да ұйымдастырамыз. АРБЗ өнімдерін елдің барлық аумағына жөнелтеміз. 100 метрлік рельстер күнделікті тиеледі. Ал 25 метрлік рельстерді Ресейге, Өзбекстанға, Түркіменстанға жөнелтіп жатырмыз. Логистика мүмкіндіктері жылдан-жылға артуда», – дейді станция басшысының орынбасары. 

Ел аумағына құрылыс заттарын жеткізу жұмыстарының да денін Жіңішке станциясы ұйымдастырып отыр. Атырау-Астрахань жолының құрылысына қажетті көпірдің бетондары да осы станциядан, бетон зауытынан жөнелтіледі. 

Жіңішке станциясының кезекшісі Асылбек Өсербаев алдында тұрған таблоға қарап отырып, бізді станция жолдарында жүріп жатқан тиеу-түсіру жұмыстарымен таныстырды. «Күніне төрт пойыз жіберіп, төрт пойыз қабылдаймыз. Барлығы – жүк пойыздары. Міне, мына жолда жүк қабылданып жатыр, ал анау жолда жөнелту жұмыстары ұйымдастырылуда, қазір локомотив келеді...» деп тәптіштей түсіндірген Асылбек осыған дейін станцияда пойыз құрастырушы болып 8 жыл жұмыс істеген екен. Бүгінде жүк станциясының барлық қыр-сырын бес саусағындай меңгеріп алған маман. 

Жіңішке бекетінің аға вагон қараушысы Мұхтар Жақыпов ауысымдағы жігіттерімен келген-кеткен вагондардың техникалық жағдайын тексеріп жүр. «Біздің станция жұмысы оңай емес, экспортқа жөнелтілетін вагондар мен контейнерлер жіті тексеруді қажет етеді. Қарамағымда 18 вагон қараушы бар. Бәрі өз кәсібін толық меңгерген мамандар, сырттан келген ешкім жоқ», – дейді ол.