Әйтеке би станциясында айына 5 мың тонна астық тиеледі

Ақтөбе өңірінде орналасқан Әйтеке би станциясында бидай экспорттау жұмыстары жылдың төрт мезгілінде ұйымдастырылып келеді. Бұл жерден астық Түркия, Өзбекстан, Ауғанстан елдеріне жөнелтіледі.

Өткен жылдың қорытындысы бойынша станцияда 348 вагоннан жүк түсірілсе, тиелген астық көлемі 41 710 тоннаны құраған. Бұл станциядан тиелген жүктің денін астық өнімі құрап отыр. 2022 жылы да осы жұмыстар жалғасын табуда. Күніне 13-14 жүк пойызы және станция үстімен 3-4 жолаушылар пойызы өтеді. Сонымен қатар Маңғыстау-Семей бағытындағы жолаушылар пойызы, Орал-Алматы бағытындағы Тальго пойызы өтіп жатыр.

Төртінші класты станция басындағы қызу тірлікпен Әйтеке би станциясы басшысының орынбасары Еркебұлан Ермағамбетов таныстырды. Оның айтуынша, станция басында үш кірме жол бар. Оның бірінде, газбен қамтылмаған ауылдардағы мемлекеттік мекемелер, әлеуметтік нысандарға таратылатын көмір түсіру жұмыстары ұйымдастырылады. Ал «Жайылхан» ЖШС-мен байланысқан кірме жолда астық тиеледі. Өйткені, астықты «Жайылхан» ЖШС-нің 88 вагоны экспорттайды. 

«Айына 4-5 мың тонна астық тиеледі. Бидайды сұранысқа байланысты жөнелтеміз. Біздің міндетіміз – вагондарды астық тиеуге қойып беру. Тиеу жұмыстары аяқталған соң вагондарды жалғап, жөнелтеміз. Биыл мамыр айынан бастап санкцияға байланысты астық өнімін экспорттау тоқтатылып тұр», – дейді Еркебұлан Ермағамбетов. 

Ал «Текше тас» ЖШС-не қарасты кірме жолда Түркістан облысының Сайрам ауданына саз тиеліп жатыр екен. Осы жердің жер қойнауынан шығатын сапалы саз балшығына сұраныс жоғары болып тұр. Бұл сазды қыш бұйымдарын жасауға пайдалануда.