Жем станциясында газ тасымалының көлемі артты

Қазақстанның барлық өңіріне газ жеткізіп отырған Жем станциясында жұмыс қауырт жүріп жатыр. Жаз айларында жүк тасымалы арта түскен. Әсіресе станциядан Жаңажол газын әлем елдеріне экспорттау жұмысының көлемі де, ауқымы да өскен.

Пойыздарды қабылдап-жөнелтуден бөлек станция аумағындағы ірі өндіріс орындарында тиелген жүктерді жеткізу жұмыстары да жолға қойылған. Ел экономикасын арттыруға сүбелі үлес қосып отырған шағын станцияда ауыз толтырып айтар ауқымды жұмыстар бар. Жем станциясы бастығының орынбасары Нұрғали Әділов жасалып жатқан жұмыстар туралы айтып берді.

– Аумақтағы ең ірі жүк тиеушілердің бірі – «СНПС Ақтөбе мұнай газ» компаниясы. Станциядан 85 шақырым жердегі Жаңажол кен орнынан газ тиеу жұмыстары жүргізіліп, Жем арқылы Қазақстанның барлық территориясына және экспортқа жөнелтіледі. «Ақтөбемұнайгаз» компаниясына тиесілі Жаңажол мұнай-газ конденсат кен орнының газын өңдейтін зауытта жылына 5 миллион тонна мұнай, 2,2 миллиард м³ газ дайындайтын технологиялық желі бар. Зауыт басынан күніне кем дегенде 30-40 вагон газ тиеу жұмыстары жүргізіледі. Нұрғали Әділовтың айтуынша, бұл ең төменгі мөлшер. Күніне жүз вагонға дейін газ жөнелтілетін кез болады.

«Газ тиеу жұмыстары әр күнде әрқалай. Мәселен, бүгін 67 вагон жөнелттік. Газ осы жерден Қазақстанның барлық облысына жөнелтіледі. Сонымен қатар экспортқа да тиеліп жатыр. Біздің станциядан тікелей Ауғанстанға, Хайратон және Галаба станцияларына жеткізіледі. Өткен айдан бастап Беларусь арқылы Польшаға газ жөнелту жұмыстары ұйымдастырылуда», – дейді станция басшысының орынбасары.  

Айтпақшы, Жаңажол кен орнынан алынатын күкірт тиеу жұмыстары да осы жерден ұйымдастырылады. Сонымен қатар, станциядан 18 шақырым жерде кен өндіру зауыты бар. Күніге 84 вагонға кен тиеу жұмыстары жүргізіліп, Кемпірсай станциясына жіберіледі. 

Станция басындағы тағы бір ірі жүк жөнелтуші «AltynEx Company» АҚ. Құрамында алтыны бар тас өндіретін кәсіпорын өнімі Қостанай облысының Баталы станциясындағы зауытқа жеткізіледі. 

Бір ғасырлық тарихы бар Жем станциясы 1905 жылдан жұмыс істеп тұр. Станция кезекшілері- нен бөлек белгі беруші, вагон құрастырушы, тауар кассирлері т.т. барлығы 70 шақты адам еңбек етеді. «Станцияда 5 кезекшіміз, ауы- сыммен жұмыс істейміз. Тақ және жұп екі парк бар. Тақ паркінде 7 жол, жұп паркінде 13 жол. Станцияда жүк тиеуден бөлек кестеге сай жолаушы және жүк пойыздарын қабылдап-жөнелтеміз. Қазір тәулігіне тақ жолдан 20 пойыз, жұп жолдан 20 пойыз өтеді », – дейді станция кезекшісі Раушанбек Наванов. Теміржолшылар әулетінен шыққан Раушанбек алты жылдан бері Жем станциясында еңбек етеді. Пойыздарды қабылдап-жөнелтуден бөлек станция басында бригада, тепловоздарды ауыстыру жұмыстары да жүргізіледі. Қазір күнге 120-дан аса вагон тиеп-жөнелту жұмыстарын ұйымдастырып отырған станцияда пойыздар саны алдағы уақытта артып, 50-60 пойыз өтеді деген болжам бар.