50 жылдан астам тарихы бар депо бүгінде жаңа өндірісті игеріп отыр
Ақтөбе облысы бойынша меншікті тілші
Ақтөбе облысының әкімі өңірдің бюджетіне қомақты үлес қосып отырған теміржол кәсіпорындарының жұмысымен жан-жақты танысты.
Облыс басшысы алдымен ат басын бұрған мекеме Шалқар станциясындағы локомотив жөндеу кәсіпорны болды. “Қамқор локомотив” ЖШС қарасты сервистік орталықта бүгінгі таңда жылына 350-ден аса тепловоз сауықтырылады. 50 жылдан астам тарихы бар кешегі депоның даңқы кезінде шартарапқа тараған. 1960 жылдары ары-бері қазақ жерінен өткен паровоздар мен тепловоздар осында аялдап, жеңіл-желпі жөндеу, техникалық қызмет түрлерінен өтеді екен. Кезінде мыңнан астам адам еңбек еткен ірі депо болған. Локомотив деполары нарықтық қатынастарға сай пайдалану және жөндеу секторына бөлінген соң тек темір тұлпарларға сервистік қызмет көрсетумен айналысатын мекеме бүгінде толықтай қайта құрылған, жаңа өндірісті игеріп, жұмысын дөңгелетіп жүргізіп, соған лайық табыс тауып отыр.
Теміржолшылар өңір басшысына өндіріс орнын таныстырып, цехтар мүмкіндігін көрсетіп, жанжақты ақпар берді. Тепловоздағы ақаудың аппарат арқылы қалай анықталатыны, депоға әкеліп қалай тексерістен өткізілетіні, әр тепловоздың қолдану уақытына байланысты жүрісі қалай бақыланып отыратынына дейін түсіндірді.
– Біздің сервистік орталықтың мүмкіндігі мол. Соңғы жылдары өндірістің заманауи аппараттармен жабдықталу деңгейі артып, тепловоздың астын толық ашып, тексеру мүмкіндігі жоғарылады. Қазан айында Ресейден 25-МК локомотиві келу керек. Оның сервисін меңгеру үшін онлайн оқып жатырмыз, яғни локомотив жөндейтін слесарьлар жаңа аппаратпен онлайн түрде танысып, пайдалану ерекшелігін меңгеруде, – деді сервистік орталық басшысы Қайрат Махамбетов.
Бүгінде кәсіпорында 387 адам еңбек етеді. Оның 250-і – слесарьлар. Орташа айлық 185 мың теңгені құрайды. Жылдар бойы осы кәсіпті меңгерген тәжірибелі мамандар тепловозды шашып, қайта жинап, жөндеу және құрастыру жұмыстарын толық игерген. Қолымыздан келмейді деп теміржол машиналарын қайтару немесе зауытқа жіберу жағдайы сирек. Еңбек өнімділігі де жоғары. Айына 35-40 тепловозды жөндеуден өткізуге мүмкіндіктері жетеді.