Алмат алған асулар

Республика күні мерекесіне орай марапат мінберінен табылған теміржолшылар қатарында Шиелі теміржол вокзалының бастығы, «Үздік басшы» Алмат Досымов та бар. Ол – теміржолшылар әулетінің өкілі. Оған теміржолдың тыныс-тірлігі бала кезден таныс.

Сондықтан болса керек, оның таңдауы Алматы теміржол институты болды. Білім алды. Темір жолда еңбек жолын бастады. Содан бері 30 жылдан астам уақыт өтіпті. Бұл қызығы мен қиындығы қабаттаса, қатарласа жүрген, түрлі қызметтік сатылардан өткен жылдар. Қазір Алмат өз ісінде тіс қаққан теміржолшы. Тәжірибесі мол, біліктілігі білдей бір маман. Сөзімізге Алмат алған асуларға берілген марапаттар дәлел.  

Мәселен, Алмат Нұрмағанбетұлы 2021 жылы Шиелі ауданы бойынша «үздік теміржолшы» атанса, 2022 жылы Қазақстан темір жолының 25 жылдығында «Үздік басшы» төсбелгісін алды.  

– Алмат іскер басшы. Және бұл жай сөз емес. Өткен жылы аудан бойынша үлгілік семинар өткізуге, аудан басшылары, осы Шиелі теміржол вокзалын таңдапты. Неге дейсіз ғой... Мекемелердегі тәртіп, аула тазалығы, еңбек қатынастарының сақталуы секілді бірнеше критерийлерді нысанаға алған тексеру комиссиясы Шиелі теміржол вокзалын ауласы гүлмен көмкеріліп, абаттанған ең таза мекеме деп, ал еңбеккерлерін ең үздік ұжым деп таныпты. Кейін теміржол вокзалында комиссия құрамының шешімімен үлгілік семинар ұйымдастырылды. Бұл аудан көлемінде вокзал ұжымының салмақты орны бар екенін, ал осы ұжымды ұйыстыра білген Алматтың білікті басшы екенін көрсетеді, – дейді Қызылорда магистральдық желі бөлімшесі директорының орынбасары Нұрлан Бимұратов.  

Алмат теміржолшылар әулетінен екенін және оның еңбек өтілінің өсуіне үлес қосып жүргенін мақтан тұтады. Еңбек өтілі демекші, Алматтың әкесі Нұрмағанбет Досымов 37, анасы Қарашаш 15 жыл сол кездегі Шиелі жол дистанциясында жұмыс істеп, жолшылар әулетінің қалыптасуына ұйытқы болған. Кейін ағалары Бақыт 44, Дәулет 39, Қанат осы еңбек ұжымында 10 жыл жұмыс жасап, дистанцияның өркендеуіне үлес қосқан екен. Қазір Алматтың ұлы Бексұлтан да ата жолын қуып, бес жылдан бері жол дистанциясында инженер болып жұмыс істеп жүр. «Ұяда не көрсең, ұшқанда соны ілерсің» деген осы болса керек.