Сексеуіл станциясы жүк тиеу жоспарын екі есе арттырды

Қызылорда жүк тасымалына қарасты Сексеуіл станциясы – Жезқазған-Арыс-Ақтөбе бағытына жұмыс істейтін аймақтағы негізгі тораптық станцияның бірі. Сексеуіл арқылы өтетін жүк және жолаушы пойыздарының қозғалысы бүкіл Сыр өңіріндегі өндірістің дамуына серпін беріп отыр десек, қателеспейміз.

Жыл басынан бергі он айда Сексеуіл станциясына 2886 пойыз қабылданып, 168 599 вагон ажыратылып, тиісті құжаттары рәсімделіп, нысаналы бағыттарға жөнелтілген.  

– Он ай ішінде маневрлік және пойыздық жұмыстар қатаң тәртіппен орындалып, қозғалыс қауіпсіздігіне нұқсан келтіретін бірде-бір оқиға тіркелген жоқ. Барлық өндірістік процесс техникалық және еңбек қауіпсіздігі талаптарына сай жүргізілді, – дейді станция бастығы Абдулхамит Тұрмантаев.

Тек қазан айында станцияға 305 пойыз қабылданып, 17 004 вагон ажыратылып, тиісті құжаттары ретке келтірілген. Ал айлық жоспар бойынша 90 вагонға жүк тиеу көзделсе, сексеуілдіктер бұл межені 97 вагонға жеткізіп, жоспар 107 пайызға асыра орындалған. Ал он айға жоспарланған 316 вагонға жүк тиеу жоспарының орындалуы 714 вагонға жетіп, меже екі есеге жуық артық көрсеткішті бағындырған.    

Сексеуіл станциясының әр қызметкері – өз ісінің шебері. Әр пойызды кідіріссіз қабылдап, дер кезінде жөнелтіп отыратын станция кезекшілері Жаппарберді Әбдірахманов пен Даурен Сидағұлов,  маневрлік қозғалысты шебер басқарып, вагондарды кірме жолдарға бағыттап отырған маневр диспетчері Еркебұлан Қарабаев сынды  теміржолшылар – Сексеуілдің мақтанышы. Пойыз құрамын дәлдікпен құрастырып, станция паркіндегі қозғалысты үйлестіріп отыратын Жәнібек Еспаев пен Қайрат Мұқановтың еңбегі де ерен. Бұлар пойыздардың үздіксіз қозғалысын қамтамасыз ететін негізгі буын саналады.

Ал өндірістік көрсеткіштің жоғары болуы вагон құжаттарын рәсімдеп, жүк қабылдап-тапсыру ісін тиянақтайтын Кеңесхан Сариев пен Индира Абсултанова, тауар кассирі Аманкүл Жетесова сынды мамандардың  жұмысына тікелей байланысты десек болады.  

Станция бастығы Абдулхамит Тұрмантаев жыл бойы атқарылған еңбектің нәтижесіне ерекше тоқталып, әріптестеріне шынайы ризашылығын жеткізді. Оның айтуынша, қазан айында 6635 тонна жүк тиеліп, он айлық меже 48 534 тоннаға жеткені – сексеуілдіктердің тынымсыз еңбегінің арқасы.   Станция бастығы құжаты рәсімделмей бос тұратын транзиттік вагондар уақытын қысқарту бағытындағы нәтижелерді де атап өтті. Қазан айында 2,5 сағат деп жоспарланған көрсеткіш 2,3 сағатқа дейін төмендеуі, он айдағы 2,8 сағаттық меже 2,6 сағатқа дейін жетуі – сексеуілдіктердің бұл мәселеге ұсақ-түйек деп қарамай, әр минутты тиімді пайдаланғанын дәледейді.