Қазалы теміржолшылары қауіпсіздік тұрғысынан көшілгері
Қызылорда облысы бойынша меншікті тілші
Өндірістік жұмыс көрсеткіштерін жоспардан асырып орындап жүрген Қазалы станциясының ұжымында үздік теміржолшылар шоғырланғандай. Құрамалардан вагондарды ажыратып тарату, вагондарды жаңадан қайта құрастыру секілді жұмыстарды бес саусағындай меңгерген олар жыл басынан бері пойыздық және маневрлік жұмыстар кезінде пойыздардың қозғалыс қауіпсіздігінің бұзылуына жол бермеген. Қазалы станциясының теміржолшылары биылғы сегіз ай ішінде 559 пойыздан 33692 вагонды ажыратып, қала берді 128 пойызды құрастырып, оған 34203 вагонды тіркеп, тиісті бағытқа жөнелткен. Осыншама қыруар жұмыс кезінде еңбектің қорғалуына, қауіпсіздік техникасының сақталуына ерекше мән берілген. Станция бастығының орынбасары Руслан Мақашов әріптестерінің атқарған жұмыстары көңілге қонымды, бекітілген тапсырмалар тамыз айында да өз үдесінен шыққанын айтады.
– Станция теміржолшылары маневрлік, пойыздық жұмыс кезінде кірме жолдарда қозғалыс қауіпсіздігінің бұзылуына жол берген жоқ. Вагон паркіндегі вагондар жұмысы да тиімді ұйымдастырылып отыр. Адами фактор әсерінен техникалық құрылғылардың істен шығуы болған жоқ. Бекеттің кіру бағдаршамында пойыздардың кідіруі де болған емес. Басшылық бекіткен №971-Ц бұйрығына сәйкес, бекет жолдарын, байланыс құрылғыларын әр ай сайын комиссиялық тексеруден өткізіп тұрамыз. Анықталған кемшіліктер дәрежесіне қарай уақытылы жойылып, түзетіледі, – дейді бекет басшысының орынбасары.
Ол карантиндік жағдай станцияға келетін жүктің азаюына әсер еткенін айтады. Мәселен, жүк вагондарынан жүк түсіру көрсеткіші сәл-пәл межесіне жетпей, 96,1 пайызды құраған. Дегенмен бұл көрсеткіш өткен жылдың есепті мерзімімен салыстырғанда едәуір жоғары деңгейде орындалған. Жалпы Қазалыда қыз-қыз қайнаған жұмыс. Теміржолшылар тарапынан шағымдар жоқ. Станцияда теміржолшыларға берілуі тиіс әлеуметтік көмек, қосымша көмек, маусымдық киімдер, жұмысқа қажетті құралдардың уақытылы берілуі тәртіпті жолға қойылған. Өз міндеттерін тап-тұйнақтай, жып-жинақы қалыппен атқаратын пойыз құрастырушылары Нұрғазы Өтекеш, Мейрамбек Құлмұратов, станция кезекшілері Өмірбай Қарабеков, Бақытбек Қараев, кезекші жанындағы оператор Бағдат Мүсіреп, жүк қабылдап-тапсырушы Рудба Айқабылова, парк кезекшілері Әсия Мектепова мен Темірбай Шүленбаев – әріптестеріне әрдайым үлгі боларлық азаматтар.