Ескірген құрылғылар жаңартылып жатыр

Өткен жылы Маңғыстау магистральдық желі бөлімшесіне қарасты белгі беру және байланыс дистанциясында біраз жаңарту-жаңғырту жұмыстары жүргізілген. Ескіріп тозығы жеткен құрылғылар жаңартылып, заманауи үлгілерімен ауыстырылған.

Кеңірек тоқталсақ, №16 бекет бойынша бұрынғы ескірген ҚПБ-ЭО, СП-ЭО, ҚП-50- ЭО қоректену панельдері алынып, орнына АВБҚ, ҚҚ, БҚ жаңа типті электрондық панельдер қойылған. Яғни баяғы КСРО кезінен қалған, қазірде не қосалқы бөлшегі таптырмайтын қоректену панельдері отандық өндірістен шыққан заманауи панельдерге ауыстырылған. №16 бекеттен басталған бұл жұмыс биыл жа жалғасып, жиырма шақты бекеттің қоректену панелі осындай жаңартуды күтіп тұр.  

Бұдан басқа былтыр дистанцияның 280, 252, 16-шақырымдардағы теміржол өткелдеріндегі белгі беру құрылғыларының сапасын жақсарту жұмыстары жүргізілген. Осы өткелдердегі белгі беру көрсеткішін күшейту мақсатында линзалар жиынтығы жарықдиодты модульдерге ауыстырылған. Белгі беру-байланыс саласындағы қызмет көрсетуді жақсарту бағытындағы жұмыстар өзге нысандарда да жалғасын тапқан. Бұл туралы ақпарат берген дистанцияның бас инженері Асқар Утесиновтың айтуынша, жаңарту процесі биыл да жалғасуда.  

– Осы жылғы қаңтарда Маната бекеті және №9,10 бекеттердегі радиобайланыс жұмыстарының сапасын арттыру бағытында АСТ-2 жаңа сандық немесе цифрлау радиоантенналарын орнаттық. Тозығы жеткен немесе бүгінде қолданыстан қалған ескі үлгідегі құрал-жабдықтар осылайша бірте-бірте заманауи түрлеріне орын босатуда. Былтыр Құрық портындағы паромға дейінгі сұрыптау станциясында мердігер мекемемен бірлесе отырып МПЦ құрылғыларын реттеп немесе жөндеп іске қосу жұмыстарын жүргізген болатынбыз. Ал жыл соңында Маңғыстау станциясындағы маневрлік дөңес пен механикаландырылған мұнарадағы АСДЦ микропроцессорлық диспетчерлік орталықтандыру жүйесі енгізіліп, тұрақты қолданысқа берілген. Мұндай жұмыстар биыл да жүріп жатыр, – дейді дистанцияның бас инженері.