Теміржолмен астық тасымалдау 10 айда 24%-ға өсті

Осы жылдың қаңтар-қазан айларында теміржол көлігімен астық тасымалдау көлемі өткен жылдың сәйкес кезеңімен салыстырғанда 24%-ға ұлғайды, деп хабарлайды Rail-news.kz.  

2023 жылдың 10 айында теміржолмен 9,4 млн тонна астық тасымалданды. Астық экспорты 29%-ға өсіп, 7,7 млн тоннаны құрады. Ел ішінде 1,7 млн тонна тасымалданса, бұл өткен жылғы көрсеткіштен 4%-ға артық.

Осы жылдың 10 айында ұнтақ өнімдерін тиеу 4%, яғни 2,5 млн тоннаға дейін өсті. Бұл ретте экспортқа 1,8 млн тонна жөнелтіліп, өсім 7% құрады.

Қазақстан астығы мен ұнтақ өнімдерін өткізудің негізгі нарықтары Орталық Азия, Ауғанстан, Иран, Ресей және ҚХР елдері болып отыр. 10 айда Өзбекстанға астық тасымалдау 24%, Тәжікстанға 9%, Түрікменстанға 78%, Ресейге 56%-ға өсті. Қырғызстанға астық тиеу екі есе, ҚХР-ға тиеу үш есе артты. Өзбекстанға ұнтақ өнімдерінің экспорты 5%, Қырғызстанға 67% және Қытайға 79% өсті.

Қазан айында 900 мың тоннадан астам астық, 283 мың тонна ұнтақ өнімдері тасымалданды. Ел ішінде астық тасымалы 25%, ұнтақ өнімдері 42% өсті.

Астық пен ұнтақ өнімдерін тасымалдауға 17,2 мыңнан астам жабық вагон және 10 мыңнан астам астық тасымалдаушы тартылды.

ҚТЖ желісі бойынша жүктерді тасымалдау теміржол инфрақұрылымының өткізу қабілетін ескере отырып, жүк жөнелтушілердің өтінімдері бойынша алдағы айға қалыптастырылатын негізгі жоспар шеңберінде жүзеге асырылады.