Баку–Тбилиси–Баку жолаушылар пойызының қозғалысы қайта жанданды
Грузия премьер-министрі Ираклий Кобахидзенің WUF13 форумына қатысу үшін Әзербайжанға жасаған сапары аясында екі ел стратегиялық серіктестігін тағы бір мәрте айқындап, экономика, энергетика және көлік байланысын тереңдетуге бағытталған ауқымды келісімдер пакетіне қол қойды. Құжаттарға қол қою рәсімі 2026 жылғы 18 мамырда Баку қаласында Әзербайжан Президенті Ильхам Әлиев пен Грузия премьер-министрі Ираклий Кобахидзенің қатысуымен өтті, деп хабарлайды Rail-news.kz.
Axar.az сайтының хабарлауынша, тараптар қол қойылған құжаттардың маңыздылығын атап өтті. Әсіресе, Әзербайжан мен Грузияның көптеген ел үшін маңызды көлік-логистикалық торап ретіндегі рөліне тоқталып, бұл бағыттағы ынтымақтастықты одан әрі нығайту қажеттігіне назар аударды.
Қол қойылған құжаттар қатарында Грузияға табиғи газ жеткізу, Әзербайжан газын халықаралық нарықтарға транзит арқылы жеткізуді жалғастыру, Грузияға электр энергиясын жеткізу және оны Грузия аумағы арқылы Түркияға тасымалдау туралы үкіметаралық келісімдер бар. Сондай-ақ, Баку–Тбилиси–Карс теміржол жобасы аясындағы жаңғырту жұмыстарының аяқталғанын және нысанның толық қабылданғанын растайтын Үйлестіру кеңесінің хаттамасына қол қойылды.