Жылу беру маусымы: Теміржол көлігімен 22 млн тонна көмір жеткізілді
ҚТЖ осы жылдың мамыр-тамыз аралығында ел тұрғындары үшін 22,1 млн тоннадан астам көмір жеткізген, деп хабарлайды Rail-news.kz.
Жылыту маусымына дайындық кезеңінде (осы жылдың мамыр - тамыз айлары) ҚТЖ желісінде қазақстандық тұтынушылар үшін көмір тиеу өткен жылдың сәйкес кезеңімен салыстырғанда 2%-ке өсіп, 22,1 млн астам тонна болды. Оның ішінде еліміздің негізгі ЖЭО-на 19 млн тонна қатты отын тиеліп, жоспар 100% орындалды. Тұрғындар мұқтаждығы үшін - 3,1 млн тонна, бұл 2021 жылғы деңгейден 28%-ке жоғары.
«ҚТЖ» ҰК» АҚ-да 2022-2023 жылдарға арналған көмір тасымалын қамтамасыз ету жөніндегі жол картасы бекітіліп, оған вагондар мен локомотивтер паркін тасымалдауға дайындау, тасымалдарды маршруттау жөніндегі іс-шаралар енгізілді.
Еліміз тұтынушыларын дер кезінде қатты отынмен қамтамасыз ету үшін ҚТЖ жылу беру маусымы қарсаңында «Қазтеміртранс» АҚ паркінің жартылай вагондарын экспортқа тиеуге тыйым салды. Еліміздің солтүстік өңірлері үшін көмір тиеу басымдыққа ие, мұнда ертерек суытып, аяз болуы мүмкін.
Павлодар облысының «Богатырь» және Қарағанды облысының «Молодежный» көмір разрездерімен бірлесіп, айналма және жөнелту маршруттары ұйымдастырылады. Құрамдар разрездер мен станциялар арасында айналымға түсіп, түсірілгеннен кейін таралтылмай, көмірді жаңадан тиеуге жіберіледі. Бұл тәсіл вагондардың айналымын тездетеді.
ҚТЖ-да көмір тасымалдау бойынша жедел штаб ұйымдастырылса, жол бөлімшелерінде мониторингтік топтар құрылған. Штаб вагон айналымын бақылап, вагондардың жүк операцияларында тұрып қалуын қысқарту жөнінде шаралар қабылдайды. Жедел топтар станцияда көмірдің түсуіне, көмір қоймаларында қатты отынның болуына тәулік сайын мониторинг жүргізеді.
Ортақ тәсілдерді әзірлеу үшін облыстар, республикалық маңызы бар қалалар әкімдіктерінің, көмір разрездері өкілдерінің, кірме жолдар меншік иелері мен жалға алушыларының қатысуымен кеңестер өткізіледі.