Жасанды интеллект қолданыста
Ақтөбе облысы бойынша меншікті тілші
Ел Президенті жариялаған Цифрландыру және жасанды интеллект жылы аясында Ақтөбе магистральдық желі бөлімшесінде ауқымды цифрлық жобалар қолға алынды. Бөлімше әзірлеген жобалар тек өңірде ғана емес, бүкіл ҚТЖ жүйесінде қолданысқа енгізілуде.
«ҚТЖ» ҰК» АҚ Ақтөбе магистральдық желі бөлімшесінің басшысы Бөріхан Беркімбаевтың айтуынша, мұндағы басты бағыттардың бірі – нормативтік-техникалық құжаттарды цифрлық форматқа көшіру. Қазіргі уақытта станциялардың техникалық-өкімдік актілері, технологиялық карталар, жергілікті және уақытша нұсқаулықтар жиналып, корпоративтік ақпараттық порталға орналасқан. Құжаттарды тұрақты жаңарту жұмыстары да жалғасуда.
Бөлімше қызметкерлерінің лауазымдық нұсқаулықтарын цифрландыру жұмыстары да қолға алынған. Бүгінде құжаттардың 50 пайызы «ҚТЖ-МП» мобильді қосымшасына жүктелді. Қалған бөлігі кезең-кезеңімен енгізілуде. Бұл тәжірибені кейін бүкіл ҚТЖ бойынша тарату жоспарланған.
«Мемлекет басшысы 2026 жылды Цифрландыру және жасанды интеллект жылы деп жариялады. Осыған орай бөлімшеде өндірістік үдерістерді жетілдіру, құжат айналымын цифрландыру және қызметкерлердің біліктілігін арттыру бағытында жүйелі жұмыстар жүргізілуде. Қызметкерлеріміз цифрлық технологияларды енгізу бағытында елеулі нәтижелерге қол жеткізді. Бұл жұмыстар тек бөлімше деңгейінде ғана емес, бүкіл ҚТЖ жүйесінде қолданылып жатқан жобаларды қамтиды. Бүгінде ҚТЖ-МП мобильді қосымшасын ҚТЖ бойынша 25 мың қызметкер пайдаланса, оның 5 мыңы – Ақтөбе магистральдық желі бөлімшесінің қызметкерлері. Бұл цифрлық шешімдердің тиімділігін және олардың қызметкерлер арасында сұранысқа ие екенін көрсетеді», – деді Б.Беркімбаев.
Ақтөбелік теміржолшылар әзірлеген тағы бір маңызды жоба – мобильді қосымша арқылы онлайн тестілеу жүйесі. Қызметкерлерді оқытуға арналған бағдарлама аясында әр мамандыққа бейімделген тест сұрақтары жаңартылды. Алғашқы сынақ тестілеуіне мақсатты аудиторияның 70 пайызы қатысып, жоғары нәтиже көрсетті. Қызметкерлерге тестті бірнеше рет тапсыру мүмкіндігі берілген. Оқыту сапасын арттыру үшін жасанды интеллект те қолданылуда. Ол тест сұрақтарының мазмұнын жеңілдетіп, түсінікті етуге көмектеседі.