Биыл 226 жаңа вагон сатып алынады

ҚР Көлік министрлігі Теміржол және су көлігі комитеті төрағасының орынбасары Нұржан Келбұғанов Орталық коммуникациялар қызметі алаңында өткен баспасөз конференциясында теміржол саласында жүзеге асырылып жатқан ірі инфрақұрылымдық жобаларға тоқталды.

Бұл – жалпы көлемі 1300 шақырымды құрайтын 4 жоба: Достық – Мойынты және Алматы айналма жобасы, Дарбаза – Мақтаарал және Қытай елімен қосатын Аягөз – Бақты теміржол өткелі және жаңадан қосылған Қызылжар – Мойынты телімі.  

– Жоспар бойынша Достық – Мойынты және Алматы айналма жобасы биыл бітіп, қолданысқа беріледі. Сонымен қатар ұзындығы 366 шақырым болатын «Қызылжар-Мойынты» жаңа теміржол желісі салына бастады. Бұл ТХКБ-ны 150 км-ге қысқартуға мүмкіндік береді. Бұдан бөлек, инфрақұрылым қуаттылығын арттыру және өткізу қабілетін кеңейту мақсатында «Алтынкөл-Жетіген» және «Бейнеу-Маңғыстау» учаскелері жаңғыртылады. «Қызылжар-Сексеуіл», «Шалқар-Бейнеу» учаскелерінде автоблоктау жаңа жүйелері енгізіледі. 2030 жылға дейінгі көлік-логистика әлеуетін дамыту тұжырымдамасы аясында инфрақұрылымды дамыту бойынша нақты шаралар іске асырылып жатыр. Қазір екі негізгі транзиттік дәліз – Транскаспий халықаралық көлік бағдары мен «Солтүстік-Оңтүстік» дәлізінің шығыс бағытына басымдық беріліп отыр. Сонымен қатар теміржол тасымалы бойынша транзиттік тасымал 60% ұлғаяды, контейнерлік тасымал 55% артып, 2 млн контейнерге жетеді, автокөлік транзитінің көлемі 6 есеге, 29 млн тоннаға дейін өседі. 2030 жылға қарай Қазақстандағы транзиттік жүк тасымалы көлемін екі еседен астам, 74 млн тоннаға арттыру жоспарланған. Қазіргі таңда елімізде 5 теміржол және 8 автокөлік дәлізі қалыптасып, тиімді жұмыс істеп тұр, – деді спикер.

2024 жылы Қазақстан арқылы транзиттік жүк тасымалы 34 млн тоннадан асты, бұл 2023 жылмен салыстырғанда 6% көп. Барлық жүктің 80%-ы теміржол арқылы, 20%-ы автокөлікпен тасымалданды. Биыл жолаушылардың жайлылығы мен тасымалдың сапасын арттыру үшін 226 жаңа вагон сатып алынады. Аталған жаңа вагондар 13 бағыт бойынша қатынайды және халықаралық бағыттарға да қосылады. Былтыр осы мақсатта 143 жаңа вагон сатып алынған. Ал негізінен 2029 жылға дейін отандық вагон паркін 1000 вагонға дейін жаңарту жоспарда бар.  

– Болашақта Румыния, Венгрия және Қытайдың Үрімші қаласында бірлескен терминалдар ұйымдастыру мәселесі қарастырылуда. Жалпы алғанда, сыртқы терминалдық қуат 4 есе өсіп, жылына 2 млн 500 мың контейнерге жетеді, бұл жүк ағындарын біздің көлік инфрақұрылымымызға тартуға мүмкіндік береді. Осы жобалардың арқасында транзит 3 есеге артып, 76 млн-ға жетеді. Бұл еліміздің көліктік-транзиттік әлеуетінің дамуына зор үлес қосады, – деді Н.Келбұғанов.  

Сонымен қатар көршілес елдермен теміржол түйіспелерінде пойыздарды өткізу қабілетін арттыру, ішкі терминалдық желіні дамыту, Қазақстанның шетелдегі жүк қалыптастыру нүктелеріндегі географиясын кеңейту бойынша шаралар қабылдануда.